Կառավարությունը կփորձի անհույս վարկ ունեցող 218 հազար մարդուց օգնել միայն 131 հազար աշխատանք ունեցողներին

«ԿԲ-ի տեղեկություններով` 2024-ի հոկտեմբերի 1-ի դրությամբ անհուսալի վարկ ունեցող ֆիզիկական անձ վարկառուների թիվը 341 հազար է, իսկ վերջիններիս վարկային ընդհանուր բեռը՝ շուրջ 642 մլրդ դրամ»,- կառավարության նիստում ասաց ԱՍՀ նախարար Նարեկ Մկրտչյանը:

Նրա նշեց, որ 2023-ի ապրիլին այդ նույն բեռը կազմել է 525 մլրդ դրամ և մեկ տարվա ընթացքում ավելի քան 100 միլիարդով ավելացել է գումարը։

Մկրտչյանի խոսքով՝ անհուսալի վարկառուների մինչև 20 %-ն է, որ ունի ֆորմալ զբաղվածություն, մնացածը կա՛մ չունեն աշխատանք, կա՛մ ոչ ֆորմալ զբաղվածության մեջ են, նրանց մի մասն էլ՝ որպես անապահով ընտանիք, հաշվառված է անապահովության գնահատման համակարգում և պետությունից նպաստ է ստանում:

«Նախագծով առաջարկվում է 2025 թվականի փետրվարի 1-ից գործարկել միջոցառում, որի շրջանակում կարող են շահառու դառնալ վարկային պարտավորություն ունեցող այն անձինք, որոնց ունեցած բոլոր վարկերի մայր գումարների հանրագումարը փոքր է 1 մլն դրամից, և այդ վարկերը դասակարգված են անհուսալի դասով առնվազն 3 տարի»,- հայտնեց նախարարը՝ հավելելով, որ շահառուին նախատեսվում է տրամադրել ֆինանսական աջակցություն, եթե վերջինս ունենա գրանցված զբաղվածություն և աջակցությունը կկազմի աշխատավարձից հաշվարկված եկամտային հարկի գումարի չափ և այն կուղղվի շահառուի՝ անհուսալի պարտավորության մարմանը:

Նախարարի ներկայացմամբ՝ ֆինանսական աջակցությունը կտրամադրվի առավելագույնը 24 ամիս ժամկետով՝ սկսած շահառու դառնալու հաջորդ ամսվա 1-ից:

«Շահառու ճանաչվելու դեպքում աշխատավարձից բռնագանձվող գումարի չափը նախատեսում ենք սահմանել 20%, այժմ այդ գումարի չափն աշխատավարձի մինչև 50 % է, այսինքն՝ այստեղ էլ ենք նվազում իրականացնում, իսկ պոտենցիալ շահառուների խումբը 218 հազար անձ է, ընդ որում՝ նրանցից 65 %-ը 26-50 տարեկանի միջակայքում է, այսինքն՝ աշխատունակության ամենաակտիվ շրջանում են»,- հայտնեց ԱՍՀ նախարարը:

Նախարարը նաև տեղեկացրեց, որ ԿԲ-ի և մյուս գործընկեր բանկերի հետ քննարկումների արդյունքում եկել են պայմանավորվածության, որ բանկերն էլ իրենց հերթին վարկային գծով առաջացած տույժերի և տուգանքների համար մինչև 80 %-ի չափով զեղչ կամ զիջում կսահմանեն:

Նրա տեղեկացրեց, որ շահառուների դիմելու ժամանակահատվածը մինչև 2026 թվականի հունվարի 31-ն է և վստահեցրեց, որ թիրախային խմբի շուրջ 60 %-ը կամ 131 հազար անձ կդառնա ծրագրի շահառու, և կսկսի մարել վարկային պարտավորությունները:

Նիկոլ Փաշինյանն էլ արձանագրեց՝ թե կա 218 հազար մարդ, որոնք 3 տարուց ավել ունեն 1 մլն և դրանից պակաս դրամի անհուսալի վարկ, որոնք նաև դատական պրոցեսի մեջ են:

ԿԲ նախագահ Մարտին Գալստյանն էլ ասաց. «Տույժերի-տուգանքների գումարները 80 % ենք զիջում: Ինչո՞ւ 80, ոչ՝ 100. որովհետև զիջելու ժամանակ առաջանալու է 20 %-ի պարտավորություն: Այսինքն՝ բանկերն ամբողջությամբ են զիջում, 20 %-ն էլ տալու են պետությանը»: