Վարշավա-Երևան չվերթի ուղևորներին ընկերությունը թողել է Թբիլիսիում

Մառախուղի պատճառով Երևանի փոխարեն Թբիլիսիում վայրէջք կատարած ուղևորները ստիպված են սեփական միջոցներով տուն հասնել։ LOT Polish Airlines ավիաընկերությունը հրաժարվել է Թբիլիսիից Երևան գալ՝ հայտարարելով, որ վերադառնում են Լեհաստան։

Աննա Հովհաննիսյանը գրել է.

«Վարշավայից թռանք Երևան: Վատ եղանակային պայմանների պատճառով ինքնաթիռը, ինչպես նաև հինգ այլ ինքնաթիռ, չկարողացան վայրէջք կատարել Զվարթնոցում: Որոշվեց օդում պտտվել, մինչև եղանակը բարելավվի: Մեկ ժամ անց պարզ դարձավ, որ հնարավոր չէ, և ստիպված էինք վայրէջք կատարել Թբիլիսիում:

Արդեն Թբիլիսիում, մոտ մեկ ժամ սպասելուց հետո, առանց որևէ բան բացատրելու, հայտարարեցին, որ բոլորիս հետ են տանում Վարշավա, ինչը դուր չեկավ ոչ մեկին: Ինքնաթիռում կար հիվանդ երեխա, ով արդեն պանիկայի մեջ էր և անընդհատ գոռում էր:Կային նաև մի քանի նորածին երեխաներ, տարեցներ ու վատացած ուղևորներ, քանի որ թռիչքը բավականին ծանր էր:

Մարդկանց բողոքների շնորհիվ որոշում կայացվեց թույլ տալ մեզ դուրս գալ ինքնաթիռից, և ամեն մեկն ինքնուրույն լուծի Հայաստան հասնելու հարցը: Ավիաընկերությունն ասաց, որ պատասխանատվություն կստանձներ միայն մեզ Վարշավա տեղափոխելու դեպքում: Ի դեպ, ներսում խոսում էին, որ հաջորդ թռիչքը միայն 18-ին է:

Ես լավ եմ՝ չհաշված այն, որ արդեն 30+ ժամ չեմ քնել ու, ընդհանուր առմամբ, էքստրիմ թռիչքների սիրահար չեմ: Հիմա մեզ հաջողվեց մեր հաշվին տոմս գնել, և մի քանի ժամից կթռնենք Հայաստան: Հուսամ՝ ամեն ինչ կստացվի:

Աստված պահապան»: