Սիրիայից հետո Էրդողանը կարող է համոզել Պուտինին փոխել իր դիրքորոշումը՝ Զանգեզուրի միջանցքի բացման հարցում. The Times of Central Asia
The Times of Central Asia-ն գրում է, որ Սիրիայում հայտնի իրադարձություններից հետո Թուրքիայի նախագահ Ռեջեփ Թայիփ Էրդողանը կարող է համոզել ՌԴ նախագահ Վլադիմիր Պուտինին փոխել իր դիրքորոշումը Զանգեզուրի միջանցքի բացման հարցում, իսկ դրա դիմաց Ռուսաստանի նախագահին օգնություն առաջարկել Սիրիայում՝ ռուսական զորքերի պահպանման հարցում։
«Ռուս-թուրքական համաձայնությունը կարող է վերաբերել նաև Ադրբեջանի և Թուրքիայի՝ Զանգեզուրի միջանցքով Նախիջևան և հետագայում Կենտրոնական Ասիա մուտքի հարցը։ Պուտինն այժմ Էրդողանի հույսն է, որովհետև նա կստանա այն, ինչ ուզում է նրանից»,-գրում է պարբերականը: Թուրքիան կարող է օգտագործել իր ազդեցությունը Սիրիայում ավելի մեծ աշխարհաքաղաքական նպատակների հասնելու համար, ինչպիսին, օրինակ, Զանգեզուրի միջանցքի բացումն է։
Ինչպես նշվում է The Times of Central Asia-ի հոդվածում, Թուրքիան և Ադրբեջանը ներկայումս ցամաքային ճանապարհով կապված են Վրաստանի տարածքով։ Սակայն Զանգեզուրի միջանցքը Ասիայից Եվրոպա ամենակարճ ցամաքային ճանապարհն է, որը մեծ հեռանկարներ է բացում անդրկասպյան տրանսպորտի զարգացման համար՝ ընդգրկելով գրեթե ողջ Կենտրոնական Ասիան և Հարավային Կովկասը։
Ղրղզստանում գործող Global Civil Initiatives հասարակական կազմակերպության տարածաշրջանային տնօրեն Ռաիսա Մուխուտդինովան նշել է, որ Զանգեզուրի միջանցքը ջրբաժան է Կենտրոնական Ասիայի համար, որն առաջարկում է աննախադեպ տնտեսական ինտեգրում և կապ Ասիայի և Եվրոպայի միջև:
