«Գերազանցիկ» Արփինե Սարգսյանը կտրվեց առաջին քննությունից

Գրեթե մեկ ամիս է, ինչ ՀՀ ՆԳ նախարարի պաշտոնում նշանակվել է Արփինե Սարգսյանը: Թվում էր, թե հանրությունը երիտասարդ, նոր հայացքների տեր նախարարից պետք է կարճ ժամանակում դրական տեղաշարժեր նկատեր. այդ մասին երկու տարի է` ակնարկում էին սորոսական իրավապաշտպանները:

Սակայն հանրությունը բոլորովին այլ իրականության ականատեսը եղավ, ինչի մասին էլ բարձրաձայնում էին իրավապահ ոլորտի հնաբնակները: Առաջին գործը, որ ձեռնարկեց Արփինե Սարգսյանը դա, այսպես կոչված, թիկնազորով և ուղեկցող մեքենաներով շրջելու դեմ պայքարն էր: Հանուն արդարության նշենք, որ այստեղ երիտնախարարուհին օրիգինալ չգտնվեց. նման շոուներ իրականացրել են այս համակարգի բոլոր ղեկավարները և աշխատանքի իմիտացիայի այս ձևը հոգնեցրել է մարդկանց: Տպավորություն է, որ նորանշանակ նախարարը պարզապես գուգլել էր «ինչ են արել ոստիկանության ղեկավարները» եզրույթն ու որոնման արդյունքը կյանքի կոչել:

Այս հին ու անբովանդակ քայլը բացարձակ ազդեցություն չունեցավ հանրության մոտեցումների վրա, քանի որ շոուն շրջանցեց իշխանամետ օլիգարխներին, որոնք բոլորի աչքի առաջ ինչպես շարասյուներով երթևեկում էին, նույնը ջանասիրաբար շարունակում են:

Արփինե Սարգսյանի հաջորդ պոպուլիստական քայլը կադրային «ջարդ» կոչվածի իրագործումն էր. համակարգը կամավոր լքածներին լրատվական արտահոսքով ներկայացրին «հեռացվածների», իսկ իրենց գործին նախարարի քմահաճույքով հրաժեշտ տվածներին՝ սեփական դիմումի համաձայն ազատվածների:  Այս տարբերակման իրական իմաստը երևի միայն նախարարը գիտի ու նրան այդ անբովանդակ մոտեցումը մատուցածը:

Ինչևէ, հաջորդ, ամենակարևոր «նորամուծությունը» ժամը մեկ խորհրդակցություններ անցկացնելն ու դրանց մասին պաշտոնական հաղորդագրություններ տարածելն է. գունեղ նկարներ, երկարաշունչ նախադասություններ ու ոչինչ չասող բառակույտ: Այդ հարցում էլ Արփինե Սարգսյանն իր նախորդներից ոչնչով չտարբերվեց, բացի «իրավանախորդից», որի հաղորդակցման հետ ունեցած խնդիրներից հանրությունը խոշոր հաշվով շահեց:

Իսկ իրական Հայաստանում քաղաքացիները Սարգսյան Արփիի գործունեությանն ու մոտեցումներին ծանոթացան մսավաճառների նկատմամբ իրականացված ոստիկանական բռնությունների, փողոցային առևտրով զբաղվող անձի` ոստիկանների կողմից խոշտանգման դեպքերով: Այլ կերպ ասած` իր գերազանցության մասին աջուձախ հայտարարող երիտասարդ կինը որպես արդեն առաջնային պաշտոնյա` որպես նախարար, առաջին քննությունից կտրվեց:

Մնում է սպասել երիտասարդ-բարեփոխիչ նախարարի նոր անակնկալներին, որոնք. դատելով մեկամսյա փորձից, հանրությանը այնքան էլ հաճո չեն լինի: