ՀԷՑ ընկերության տնօրեն Կարեն Դարբինյանն ազատվել է պաշտոնից․ նրան փոխարինում է Տաշիր Սամոյի եղբորորդին
«Տաշիր» ընկերության սեփականատեր Սամվել Կարապետյանի հրահանգով պաշտոնից ազատվել է «Տաշիր» ընկերությունների խմբի փոխնախագահ և «Հայաստանի էլեկտրական ցանցեր» ընկերության տնօրենների խորհրդի նախագահ Կարեն Դարբինյանը։
Նրա փոխարեն Սամվել Կարապետյանը նշանակել է իր եղբոր որդուն՝ Նարեկ Կարապետյանին։
NEWSPRESS.am-ի տեղեկություններով` Սամվել Կարապետյանին են հասել լուրեր, որ Դարբինյանը ՀԷՑ-ում իր փոքրիկ «ՀԷՑ»-ն է հիմնել ու փողեր է քամուն տալիս։ Այլ կերպ ասած` ՀԷՑ-ի ներդրումների առյուծի բաժինը, որը պետք է ուղղված լիներ սպասարկման որակի ներդրումներին, ուղղվել է Կարեն Դարբինյանի գրպանը։
Այն, որ վերջին շրջանում հոսանքազրկումները հաճախակի են դարձել, բոլորը կարող են փաստել։ Մասնագետ պետք չէ լինել հասկանալու համար, որ հոսանքի հաճախակի անջատումների պատճառը համակարգի մաշվածությունն է։
Անգամ կառավարության նիստերից մեկի ժամանակ շենքը հոսանքազրկվեց։ Իհարկե, Կարեն Դարբինյանն այն ժամանակ արդարացավ, թե՝ այն, որ Կառավարության նիստի ժամանակ լույսերն անջատվել են, մեղավորը ոչ թե ՀԷՑ-ն էր, այլ ԲԷՑ-ը (Բարձրավոլտ էլեկտրացանցեր» ՓԲԸ), սակայն, մեր տեղեկություններով, Սամվել Կարապետյանը պարզել է, որ ոչ թե ԲԷՑ-ն է, այլ Կարեն Դարբինյանի յուրացումներն են։
Հոսանքազրկումներից խուսափելու համար պետք է ռեսուրսներ ներդրվեին այդ ուղղությամբ, որը փաստացի չի արվել։
Սա էլ պատճառ է դարձել, որ Դարբինյանն ազատվի պաշտոնից։
Լուրի հետ կապված այլ մանրամասներ, փորձեցինք ճշտել «Հայաստանի էկետրական ցանցեր» ընկերության հասարակայնության հետ կապերի դեպարտամենտի պետ Նատալյա Սարջանյանից։
Վերջինս ոչ հաստատեց, ոչ հերքեց լուրը, պարզապես տեղեկացրեց, որ նիստի է՝ ավարտելուն հետ կկապվի մեզ հետ:
Այնպես որ, սպասում ենք ՀԷՑ-ի պարզաբանումներին։
Արմինե Մկրտումյան
