Բաքուն Ռուբեն Վարդանյանի նկատմամբ ընդգծված ագրեսիվ վերաբերմունք ունի, 16 գերի ունենք այնտեղ. Արտակ Բեգլարյան

Այս պահին Ադրբեջանում դատավարությունների տակ են գտնվում 16 արցախցի, կամ ավելի լայն, հայ ռազմագերիներ, որոնք դեռևս չեն դատապարտվել, ինչ-որ ընթացքում է քրեական գործը։ Այս մասին, այսօր՝ դեկտեմբերի 26-ին, «Քաղաքական դատավարությունները Բաքվում, ի՞նչ է սպասվում Ռուբեն Վարդանյանին և Արցախի նախկին ղեկավարներին» թեմայով քննարկման ժամանակ նշեց Արցախի նախկին պետնախարար, Արցախի նախկին ՄԻՊ Արտակ Բեգլարյանը:

«Բայց քանի որ հատուկ հայտարարություն է եղել Ռուբեն Վարդանյանի մասով, հատուկ ուշադրություն կա և Ադրբեջանի իշխանությունների, և տարբեր միջազգային կառույցների կողմից, այս տեսանկյունից, կարծես թե, ադրբեջանական իշխանությունները հատուկ վերաբերմունք են ցուցաբերում բացասական առումով բոլոր քաղաքական ղեկավարների հանդեպ, բայց հատկապես Ռուբեն Վարդանյանի հանդեպ: Նաև հաշվի առնելով, որ նրա ընտանիքը և նրա միջազգային իրավաբանական թիմը ավելի հանրայնորեն են պայքարում և ավելի ագրեսիվ են պայքարում այդ քրեական գործերի դեմ։

Ես վստահ եմ, որ բոլոր գործերը կարված են, հաշվի առնելով, որ նաև թե ռազմաքաղաքական ղեկավարության դեմ ինչ մեղադրանքներ էին ներկայացնում ի սկզբանե, այդ թվում Ռուբեն Վարդանյանի, որոնք հիմնականում ներառում էին ահաբեկչության կազմակերպում, ֆինանսավորում և այլն: Իսկ Արցախի ժողովրդի պայքարը որևէ կերպ հնարավոր չէ ահաբեկչության մեջ տեղավորել, որովհետև այն, ինչ որ ռազմական է եղել, ինքնապաշտպանություն է եղել, մնացածը ամբողջապես քաղաքական է եղել»,- ասաց նա:

Արտակ Բեգլարյանը նկատեց, որ նույն ռազմական պայքարը ինքնապաշտպանության կոնտեքստում էլի մեր քաղաքական իրավունքների, մեր հավաքական ու անհատական իրավունքների պաշտպանության համար է եղել։

«Ռուբեն Վարդանյանը, նախագահներ Բակո Սահակյանը, Արկադի Ղուկասյանը, Արայիկ Հարությունյանը, և մնացած ղեկավարներն այս քաղաքական պայքարի դեմքերից, առաջնորդներից են եղել: Իրենք այնտեղ են, որովհետև ղեկավարել են, առաջնորդել են մեր քաղաքական պայքարը 90-ականներից ի վեր»,- ընդգծեց Բեգլարյանը: