Ընկալումը, թե՝ ընտանիքը մյուսների համար անթափանց տարածք է, փոխվում է և անհրաժեշտորեն պետք է փոխվի․ Փաշինյան

Նիկոլ Փաշինյանը կառավարության նիստում խոսել է ընտանեկան բռնության մասին և հայտարարել, որ կան երեխաներ, ովքեր կրթությունից դուրս են մնում ամենատարբեր հանգամանքներից ելնելով․ օրինակ՝ բռնության հետևանքով։

Մինչ այդ, Աշխատանքի և սոցիալական հարցերի նախարարի տեղակալ Տաթևիկ Ստեփանյանը ներկայացրեց «Ընտանեկան և կենցաղային բռնություն գործադրած անձանց ռեաբիլիտացման ծրագիրը հաստատելու մասին» նախագիծը, որը նախատեսում է ընտանեկան և կենցաղային  բռնություն գործադրած անձանց ռեաբիլիտացիա։

Ըստ փոխնախարարի՝ նախազգուշացված անձինք կամավոր են ռեաբիլիտացվելու, իսկ պաշտպանական որոշում ունեցող ընտանեկան բռնություն գործադրած անձը պետք է ռեաբիլիտացվի։

Փաշինյանն էլ նկատեց, որ կա ընկալում, թե՝ ընտանիքը մյուսների համար անթափանց տարածք է, բայց այդ ընկալումը փոխվում է և անհրաժեշտորեն պետք է փոխվի։

«Սա որևէ կերպ կասկածի տակ չի դնում մարդու անձնական կյանքի  անձեռնմխելիությունը, իսկ այս ընտանեկան կամ կենցաղի անձեռնմխելիությունը գործում է այնքան, քանի դեռ այնտեղ չեն ոտնահարվում հանրության շահերը։ Պատերից ներս որևէ տեսակի բռնություն ուղիղ առնչվում է  նաև հանրության շահերին»,- հայտարարեց Փաշինյանը՝ բացատրելով, որ դրանց չարձագանքելն այլ դրսևորումներ էլ է լինելու։

«Բռնությունը, երբ տան մեջ կուլտուրա է, այն տնից դուրս է գալիս բակ, բակից՝ թաղ, թաղից՝ դպրոց»,-ասաց նա։

Փաշինյանի դիտարկմամբ, երեխաները հաճախ կրթությունից դուրս են մնում ընտանեկան տարբեր հանգամանքների հետևանքով։

«Մենք պետք է հասկանանք, թե ընտանիքների կողմից մանկական աշխատանքը ինչքանով է երեխաներին կանխարգելում պատշաճ կրթություն ստանալ ու կրթության հասանելիության իրավունքը»,- ասաց նա։