Պապիկյան, դու ո՞վ ես եղել, որ էսօր զինվորի ու նրա դաստիարակության մասին ես խոսում․ զինվորը դաստիարակված է, անդաստիարակությունն իրենց մեջ է․ որդեկորույս մայր (տեսանյութ)
Խաղաղ պայմաններում մահացած զինծառայողների ծնողները, արդարության հետքով, հերթական անգամ եկել են կառավարության մոտ են։ Նրանք համոզված են, որ իրենց որդիներն ինքնասպանության չեն դիմել, այլ եղել է սպանություն։ Ծնողներն արդարության չեն հասել ոչ նախկին ու ոչ էլ գործող իշխանության օրոք։
Կառավարության մոտ էին Արթուր Ղազարյանի մայրը՝ Իրինա Ղազարյանը, զինծառայող Վալերի Մուրադյանի մայրը՝ Նանա Մուրադյանը, կապիտան Անդրանիկ Մկրտչյանի մայրը՝ Նարինե Մկրտչյանը և Տիգրան Օհանջանյանի մայրը՝ Գոհար Սարգսյանը։
NEWSPRESS.am-ի հետ զրույցում Իրինա Ղազարյանն անդրադարձավ ՀՀ ՊՆ նախարար Սուրեն Պապիկյանի հայտարարությանը, թե՝ բանակում ինքնասպանությունների ու սպանությունների հարցում իր մեղքի բաժինն այնքան էլ չունի, քանի որ զինվորը բանակ է բերում իր ընտանիքի, դպրոցի ու բուհի դաստիարակությունը, վարքերն ու բարքերը։
Ինչպես Իրինա Ղազարյանի, այնպես էլ մյուս ծնողների մոտ Պաշտպանության նախարարի դաստիարակությունը կասկածներ է առաջացնում։
Նրանք պնդում են, որ իրենց որդիները ոչ միայն դաստիարակված են եղել, այլև պարգևներ ու կոչումներ են ստացել իրենց ծառայության համար։ Նրանց խոսքով, որդիներին սպանել են՝ այս կամ այն անարդարությունը քողարկելու համար։ Նանա Մուրադյանը մասնավորապես շեշտում է բենզինի գողության փաստը, որն ի պաշտոնե բացահայտվել է։ Ծնողները նկատում են՝ որպեսզի իրենց կատարած ապօրինությունները չբացահայտվի ու զինվորն այդ հարցում խնդիր չառաջացնի՝ պարզապես ազատվել են նրանից։
«Զինվորն իրենց արած կեղտոտ խաղերին չի մասնակցում, ուրեմն պետք է հոշոտեն զինվորին, որ իրենց արած կեղտերը պարտակեն»,-մեզ հետ զրույցում ասաց Նանա Մուրադյանը։
Անդրանիկ Մկրտչյանի մայրը հարց է տալիս՝ ինչպե՞ս կարող էր քառօրյա պատերազմին մասնակցած և իր սխրանքի համար պարգևատրված զինվորն ինքնասպան լինել։
«Ասում են` կաբինետում ինքնասպան է եղել, բայց էս 7 տարի է` մի դրվագով անգամ չեն կարողանում ապացուցել, որ ինքնասպանություն է»,- ասաց Նարինե Մկրտչյանը։
Իրինա Ղազարյանն էլ հավելեց․ «Էդ զինվորները դաստիարակված են, անդաստիարակությունն իրենց մեջ է․․․ Պապիկյան, դու ո՞վ ես եղել, մի հատ հետ նայի՝ դու ո՞վ ես եղել, որ էսօր զինվորի ու զինվորի դաստիարակության մասին ես խոսում»։
Արմինե Մկրտումյան
