ՌԴ Պետդուման վտանգ է տեսնում Հայաստան-ԱՄՆ համաձայնագրում

Հայաստանի և ԱՄՆ-ի միջև ստորագրված համագործակցության համաձայնագիրը, ինչպես նաև ԱՄՆ վերընտրված նախագահի՝ իր երկրի ազդեցությունն ընդլայնելու հավակնոտ ծրագրերը ցույց են տալիս, որ Դոնալդ Թրամփը կարող է դառնալ Ռուսաստանի ամենալուրջ հակառակորդներից մեկը։ Նման կարծիք է հայտնել Պետդումայի պաշտպանության կոմիտեի անդամ Վիկտոր Սոբոլևը։

Սոբոլևը իրավիճակն անվանել է չափազանց վտանգավոր Հարավային Կովկասում Ռուսաստանի շահերի համար՝ նշելով, որ նման համաձայնագրերը հակասում են Մոսկվայի աշխարհաքաղաքական շահերին:

«Իհարկե, դա սպառնում է Ռուսաստանի շահերին Անդրկովկասում։ Ի վերջո, հենց Թրամփն է այժմ ԱՄՆ-ում իշխանության ղեկին, այլ ոչ թե կաղող ու ընկնող Բայդենը։ Սա մի մարդ է, ով ցանկանում է Ամերիկան ​​մեծացնել: Եվ մենք այս մեծության կարիքը բացարձակ չունենք։ Այն, որ նա խառնվել է գործերին արդեն Հայաստանում, առաջին նշանն է, որ նա անպայման լինելու է մեր թշնամին և, հավանաբար, ամենալուրջը։ Իհարկե, Հայաստանի հակառուսական դառնալու ռիսկեր կան, եթե նրանք արդեն կնքել են նման պայմանագիր»,- հավելել է նա։