Աբսուրդ է․ հույս ունենք՝ նման բան չի կարող լինել․ Արցախի ՄԻՊ-ը՝ Բաքվի դատախազության` հայաստանյան իշխանություններին արած համագործակցության կոչի մասին

Օկուպացված Արցախի Հանրապետության Մարդու իրավունքների պաշտպան Գեղամ Ստեփանյանը ՄԱԿ-ի հայաստանյան գրասենյակի մոտ մասնակցում է հայ գերիների ազատ արձակման պահանջով արցախյան մի խումբ կազմակերպությունների նախաձեռնությամբ կազմակերպված ակցիային։ Լրագրողների հետ զրույցում անդրադառնալով Բաքվի բանտում ապօրինի պահվող ԱՀ նախկին պետնախարար Ռուբեն Վարդանյանի նախօրեին հղած նամակին, նա նշեց, որ Ռուբեն Վարդանյանի ուղերձը Բաքվի բանտից ևս մեկ անգամ հաստատեց կամ բացահայտեց այն ողջ ճշմարտությունը, որի մասին այս ողջ ժամանակահատվածում իրավապաշտպան համայնքը խոսում էր։

«Ճշմարտությունն այն է, որ  սա որևէ ձևով չի կարող համարվել իրավական գործընթաց, որ այս գործընթացի ընթացքում պահպանված չեն մարդու ամենատարրական իրավունքների պաշտպանությունը և որ մարդիկ խոշտանգվում են Բաքվի բանտերում։ Ինչ վերաբերում է միջազգային հանրությանը, ապա ոչինչ չի անելու, մինչև որ հստակ պահանջներ, ձևակերպված թե' Հայաստանի իշխանությունների կողմից, թե' Սփյուռքում մեր հայրենակիցներից կողմից չներկայացվեն։ Միջազգային կառույցներին պետք է ներրկայացվի այդ ամենը և միայն դրանից հետո է հնարավոր աճի Ադրբեջանի նկատմամբ միջազգային ճնշումը»,- ասաց Գեղամ Ստեփանյանը։

Նա նշեց, որ թեև Հայաստանի իշխանությունները հայտարարում են՝ բանակցային գործընթացներում մշտապես անդրադառնում են այդ հարցին, բայց առնվազն այդ ջանքերը տեսանելի չեն. «Իմ տպավորությունն այնպիսին է, որ առնվազն քաղաքական մակարդակում առավել մեծ ջանքերի անհրաժեշտություն կա։ Ինչ վերաբերում է  իրավականին, այո, գործընթացներ կան»։

Անդրադառնալով Բաքվի դատախազության հայաստանյան իշխանություններին արած համագործակցության կոչին՝ նա ասաց. «Բաքվի կողմից վարվող ապօրինի քաղաքականության հերթական դրսևորումն է։ Աբսուրդ եմ գնահատում առհասարակ։ Հույս, ինչ-որ առումով նաև վստահություն ունենանք, որ նման բան չի կարող լինել»։