ՀԿԵ-ի սոցծրագրերի ծավալը 2024-ին կազմել է շուրջ 215 մլն դրամ

«Հարավկովկասյան երկաթուղի» ընկերության արտաքին և ներքին սոցիալական ծրագրերի ծավալը 2024 թվականին կազմել է 215 մլն դրամ։

Ծրագրերի մեծ մասն իրականացվել է արհմիության և ընկերության կողմից Կոլեկտիվ պայմանագրի շրջանակներում, որն ուղղված է բազմահազարանոց կոլեկտիվի աշխատակիցների սոցիալական աջակցությանը:

Մասնավորապես, համատեղ միջոցներն ուղղվել են աշխատակիցների բժշկական ծառայությունների վճարմանը, Սևանի և Լոռու մարզի հանգստյան տներում աշխատակիցների և նրանց երեխաների հանգստի կազմակերպմանը, կադրերի պատրաստմանն ու որակավորման բարձրացմանը, անվճար ճանապարհորդական տոմսերի տրամադրմանը և այլն։ Բացի այդ, հաշվետու տարում խրախուսանք է տրվել աշխատակիցների ընտանիքներում 74 երեխայի ծնվելու կապակցությամբ, ինչպես նաև 110 առաջին դասարանցիների:

ՀԿԵ աշխատողների արհեստակցական կազմակերպությունների միության նախագահ Ալբինա Մարտիրոսյանը նշում է, որ արհմիության և ընկերության կողմից համատեղ ֆինանսավորվող ծրագրերն ուղղված են աշխատակիցների և նրանց ընտանիքների անդամների սոցիալական աջակցությանը:

«Առանձին ծրագրեր ուղղված են աշխատանքային պայմանների բարելավմանը։ Դրանք, անկասկած, նպաստում են կայուն և արդյունավետ աշխատանքին, բարձրացնում են նյութական և սոցիալական ապահովությունը և թիմում ստեղծում են դրական բարոյահոգեբանական մթնոլորտ: Մեր թիմը մեծ է, մարդիկ տարբեր խնդիրներ ունեն ինչպես աշխատանքային գործընթացի կազմակերպման, այնպես էլ անձնական պլանի առումով։ Հենց այստեղ է, որ արհմիությունը, որպես աշխատողների իրավունքների և շահերի պահպանմանն ուղղված կառույց, պարտավոր է արձագանքել և իր անդամների խնդիրների մի մասը վերցնել իր վրա», - նշում է Ա.Մարտիրոսյանը:

ՀԿԵ-ի արտաքին ծրագրերի շարքում հարկ է նշել աջակցությունը Ֆիոլետովո գյուղի դպրոցին, Մ.Միրզոյանի անվան երաժշտական դպրոցին, սպորտային միջոցառումների խթանմանը և մի շարք այլ ծրագրեր: 2024 թվականին արտաքին սոցիալական ծրագրերի շրջանակներում ամենաշատ միջոցներն ուղղվել են Դեբեդ գետի գարնանային վարարումներից տուժած ընկերության աշխատակիցներին՝ Սանահինի բնակիչներին, ինչպես նաև աղետի գոտում հայտնված Լոռու մարզի որոշ համայնքներին աջակցելուն։