Մեզ համար ավելի հեշտ կլիներ, որ տոմսի գինը սահմանեինք 150 դրամ՝ առանց արտոնությունների․ Ավինյան
Բացառվում է, որ տրանսպորտային համակարգում հետադիմությունը թույլ տամ։ Մեզ համար ավելի հեշտ կլիներ, որ տոմսի գինը սահմանեինք 150 դրամ՝ առանց արտոնությունների: Այս մասին գործակարգավարական նիստի ժամանակ ասել է Երևանի քաղաքապետ Տիգրան Ավինյանը:
«Բայց դա ճիշտ չէ, դա միասնական տոմսային համակարգ չէ, դա այն չէ, որ մենք վաղը պետք է նաև 250 էլեկտրոավտոբուս գնենք, որովհետև հասկանում ենք՝ վաղը տեղփոխերի քանակն ավելանալու է»,- նշել է նա:
«Մենք ահռելի ծավալուն աշխատանք ենք կատարել, սա նրա համար է, որ Երևան քաղաքն ունենա ստաբիլ, որակյալ տրանսպորտային համակարգ, ունենա տրանսպորտային համակարգ, որը մի քանի տարի հետո չի մաշվելու, վերանա:
Կանխիկ շրջանառությունը վերացնելու ժամանակ հազար ու մի պրոբլեմի առաջ ենք կանգնել: Օրինակ՝ այդ կանխիկը հանելը բերել է շատ վատ հետևանքների, ուղղակի վարորդները չեն քշել, որովհետև կանխիկ շրջանառությունը թմրամիջոցի նման մի բան է եղել համակարգի համար: Վարորդները վստահաբար մեղավոր չեն, հիմա իրենց առաջարկում ենք լավ աշխատավարձ, առողջապահական ապահովագրություն, արտաժամյայի համար գումարը պետք է վճարենք, պարապուրդի համար պետք է վճարենք՝ մարդկային պայմաններ, որ վարորդը կատարի իր գործը»,- ասաց քաղաքապետը:
Նրա խոսքով՝ քաղաքական ընդդիմադիրները հիմա զբաղվում են «քաղաքական թմրամավաճառությամբ»:
«Ես բացառում եմ՝ նրանք չեն գիտակցում ինչ են անում, նրանք առաջարկում են մարդկանց՝ կոպեկը վերադարձնել շրջանառության մեջ և կոպեկի վրա համակարգը նստացնեն, բայց այդ կոպեկը չի հասնում համակարգին, չի ծառայում նպատակին: Այդ կոպեկը չի դառնում 45 տրելեյբուս կամ ամբողջ հգամակարգրեը սպասարկող գումար»,- նշել է նա:
Ավինյանը հանձնարարեց գտնել նվազագույն տարբերակը՝ միասնական տրանսպորտային համակարգի փուլային ներդրման ուղղությամբ:
«Գնայինը, որտեղ կարող ենք ավելի ճկուն գտնվել, վստահաբար, պետք է ավելի ճկուն գտնվել։ Ի վերջո, մեր նպատակն այն չէ, որ մարդիկ պետք է ավելի շատ վճարեն։ Մեր նպատակն է, որ 4 տարի հետո այս տրանսպորտային համակարգը չմաշի գնա, ինչպես այս երկրում մաշել է ամեն ինչ»,- ընդգծեց նա:
