Սա ոչ այլ ինչ է, քան դավաճանություն՝ ընդդեմ հայկական պատմական ժառանգության. Genesis Armenia
ՀՀ վարչապետի պաշտոնն զբաղեցնող Նիկոլ Փաշինյանի՝ Հայոց ցեղասպանության եղելության դրդապատճառների վերաբերյալ Ցյուրիխում արած հայտարարությունն ու հարցադրումները ոչ միայն հակաբանական են, հակագիտական, հակաքաղաքակրթական, այլև հայ ժողովրդի և համաշխարհային պատմության ամենատգետ, ամենաամոթալի ու ամենաստորացուցիչ դեպքերից մեկը: Սա ուժեղ հարված է հայ ժողովրդի քաղաքական պայքարին, մարտահրավեր` ամբողջ քաղաքակիրթ աշխարհին, որը հազարավոր հատորներով ուսումնասիրել, հետազոտել, եզրակացրել, ճանաչել ու դատապարտել է Հայոց ցեղասպանության անքննելի իրողությունը։ Այս մասին հայտարարություն է տարածել «Genesis Armenia»-ն։
Այսօր, երբ միջազգային հանրությունը միասնաբար պայքարում է մարդկության դեմ ուղղված հանցագործությունների դեմ, Նիկոլ Փաշինյանի նման հայտարարությունները ոչ միայն ժխտում են հայ ժողովրդի իրավունքն արդարության հասնելու, սասանում հայկական պետականության իրավաքաղաքական ու անվտանգային հիմքերը, այլև ոտնահարում համաշխարհային պատմության և քաղաքակրթության արժեքները: Փաշինյանն, ըստ էության, իր խոսքում զերծ մնալով ցեղասպանության իրականացման հարցում թուրքական իշխանությունների ամբողջական և անվիճարկելի մեղսակցությունից ու պատասխանատվությունից, փորձ է անում պատմության վերանայման՝ ռեվիզիոնիզմի, որի նկատմամբ քաղաքակիրթ աշխարհը տվել է հստակ դատապարտելի գնահատական:
Փաշինյանը փորձում է վերաշարադրել համաշխարհային պատմությունը՝ Օսմանյան կայսրության և նրա իրավահաջորդ Թուրքիայի հանրապետության իրականացրած հանցագործությունները արդարացնելու կամ մոռացության մատնելու նպատակով։ Սա ոչ այլ ինչ է, քան դավաճանություն՝ ընդդեմ հայկական պատմական ժառանգության, զոհված սերունդների հիշատակի և մարդկային քաղաքակրթության արժեքների, հերթական ապացույցը, որ ՀՀ գործող վարչախումբը սպասարկում է թուրք-ադրբեջանական ժխտողական տանդեմի օրակարգը և այդ նախապայմանն իրականացնում որպես բարի կամքի դրսևորում՝ Անկարայի և Բաքվի հետ թվացյալ հաշտեցման ու հարաբերությունների կարգավորմանն ընդառաջ:
Ամոթալի է, որ Հայոց ցեղասպանության պատասխանատվության հարցի քննարկումն ու պատմության վերանայման փորձը ՀՀ բարձրաստիճան ղեկավարի պաշտոնն զբաղեցնողը կատարում է այն երկրում, որը դեռևս 2006 թ. ազատազրկման դատապարեց և տուգանեց թուրք հայտնի ժխտողական, ազգայնամոլ Դողու Փերինչեքին՝ Հայոց ցեղասպանության իրողությունը վիճարկելու համար, բայց առավել ամոթալի է շվեյցարահայ համայնքի ներկայացուցիչների կրավորական պահվածքն ու շահադիտական լռությունն այս հարցում, բացառությամբ Հայոց ցեղասպանության միջազգային ճանաչման ու դատապարտման, նաև Արցախի հայրենազրկման հարցի միջազգայնացման, դատապարտման և հայության իրավունքների վերականգնման հարցում հետևողականորեն աշխատանք տարած որոշ կառույցների ու գործիչների։
Միջազգային իրավունքի շրջանակներում ցեղասպանությունը ճանաչվել է որպես մարդկության դեմ ուղղված ոճրագործություն, դրա ժխտումը կամ մոռացության մատնելը՝ հակաբարոյական պատմական կեղծիք ու հանցագործություն։
Ջենեսիս Արմենիա ուղեղային կենտրոն/հիմնադրամը հաստատակամորեն հավատարիմ է որդեգրած ազգային-պետական ուղուն, գաղափարաբանությանը, արժեքներին, պատմական ճշմարտության և արդարության վերականգնման պայքարին:
