Ո՞ւմ հաշվին եք առաջարկում շարունակել վճարել 100 դրամ՝ ապագա սերնդի. ՔՊ-ական պատգամավորները իրար են խառնվել

Երեսունամյա սակագինն ի վիճակի չէ ապահովել թարմացված ավտոբուսների պահպանումն ու ծառայության որակը: Այս մասին իր էջում գրել է ՔՊ-ական պատգամավոր Ծովինար Վարդանյանը:

Նա, մասնավորապես, նշել է. «Ուզում եմ անդրադառնալ հանրային տրանսպորտի սակագնի շուրջ ծավալվող քննարկումներին:

Կարծում եմ՝ կարիք չկա հիմնավորելու հանրային տրանսպորտի գոյության կարևորությունը: Այսպիսով, կարող եմ արձանագրել, որ երևանցիները միմյանց հետ համաձայնել են ունենալ հանրային տրանսպորտ: Հաջորդ քայլը համաձայնության երկրորդ փուլն է. այն է՝ պահպանել ենթակառուցվածքն ու բարձրացնել ծառայության որակը: Տրամաբանությունը հուշում է, որ երեսունամյա սակագինն ի վիճակի չէ ապահովել թարմացված ավտոբուսների պահպանումն ու բարձրացնել ծառայության որակը: Նույնիսկ լուցկու գինն է փոխվել այս ընթացքում:

 Քաղաքային իշխանությունն առաջարկում է նոր սակագնային փաթեթ, որի շուրջ քաղաքացիները բուռն քննարկումներ են ծավալում: Արդյունքում քաղաքապետարանը փորձում է ճկուն գտնվել և հնարավոր հավասարակշիռ լուծումն առաջարկել քաղաքացիներին:

Այստեղ կարևոր է նկատել, որ ավտոբուսները հանրային գումարներով ձեռք բերված բարիք են և նրանց պահպանումը նույնպես երևանցիների և ապագա սերնդի համար է, և պետք է իրագործվի մեր՝ երևանցիներիս փոխհամաձայնությամբ և ջանքերով:

Հարց է ծագում «100 դրամ» ակցիայի հեղինակներին: Ուզում եմ հասկանալ՝ ում հաշվին եք առաջարկում շարունակել վճարել 100 դրամ (այլ քաղաքացիների՞, ապագա սերնդի՞), և որտեղից է գոյանալու մնացած անհրաժեշտ գումարը: Նման տրամաբանությամբ կարելի է ամեն բան ոչ թե 100 դրամով, այլ ուղղակի անվճար պահանջել»: