«Հանրային ձայն»-ից Վահան Ավագյանն ապահովեց քվորում, իշխանությունների հետ գործարքի է գնացել. ավագանու անդամ

«Հանրային ձայն» խմբակցությունից Վահան Ավագյանն ապահովեց քվորում: Այս մասին, այսօր՝ հունվարի 31-ին, տրանսպորտի սակագների փաթեթների օրակարգով հրավիրված Երևանի ավագանու արտահերթ նիստից առաջ հայտարարեց «Մայր Հայաստան» խմբակցության անդամ Արշակ Սարգսյանը։

«Նա փորձում էր մանիպուլացնել, թե 300 դրամը 150-ով  էժանացում է, բայց եթե 100 դրամից ցանկացած գին բարձրանում է,  դա թանկացում է, հետևաբար պետք է միանար բոյկոտին ու ճնշումների արդյունքում ստիպեինք քաղաքային իշխանությանը 100 դրամը պահպանվեր։ Այս պահին ինքն իշխանությունների հետ գործարքի է գնացել»,- լրագրողներին ասաց Սարգսյանը։

Նա նշեց, որ Երևանի քաղաքապետ Տիգրան Ավինյանը ճնշման արդյունքում  հայտարարեց 150 դրամի մասին. «Վստահեցնում եմ՝ ճնշման արդյունքում է եղել դա։ Մեկ օր առաջ Տիգրան Ավինյանը հայտարարում էր՝ հնարավոր չէ, հետո ասաց՝ ժողովրդի կարծիքը ես լսում եմ։ Հետևաբար, եթե լսել է ժողովրիդ կարծիքը, ուրեմն ճնշման է գնացել, տեսել է, որ ժողովրդի 95 տոկոսը դեմ է արտահայտվել, այդ պատճառով էլ գնացել է այդ ճնշմանը։ Ժողովուրդը ճնշումը պետք է մեծացնի, կոչ եմ անում՝ փետրվարի 1-ից բոյկոտել, չվճարել այնքան ժամանակ, մինչև 100 դրամ լինի»։

Դիտարկմանը՝ հսկիչներ են լինելու, քաղաքացիները խնդիրներ չե՞ն ունենա, Ա. Սարգսյանը պատասխանեց. «Քաղաքացիները չեն կարող խնդիրներ ունենալ, մենք լինելու ենք քաղաքացիների կողքին, փողոցում։ Ըստ Երևանի քաղաքապետարանի խոսնակի, լինելու են տերմինալների կողքին քաղաքացիներին օգնելու նպատակով, այլ գործառույթ իրականացնելու իրավունք չունեն»։