Զանգեզուրի պղնձամոլիբդենային կոմբինատի գործադուլի դուրս եկած աշխատակիցների քվեարկությունը շարունակվում է. քվեարկողների թիվը մոտենում է 2000-ին

Զանգեզուրի պղնձամոլիբդենային կոմբինատի պատմության մեջ առաջին անգամ գործադուլի դուրս եկած աշխատակիցները փակ, գաղտնի քվեարկություն են կազմակերպել՝ ցույց տալու, որ տնօրինությունը մոլորեցնում է հանրությանը, երբ պնդում է, թե կոմբինատի աշխատակիցների ընդամենը 7-8 տոկոսն է պահանջում աշխատավարձի բարձրացում և աշխատանքային պայմանների բարելավում, գրում է «Ազատություն»-ը։

«Աջակցու՞մ եք աշխատավարձի բարձրացման և աշխատանքային պայմանների բարելավման պահանջով կազմակերպված գործադուլին» վերտառությամբ քվեաթերթիկը լրացրել և քվեատուփն է նետել մոտ 2000 աշխատակից, իսկ կոմբինատում, ըստ ընկերության պաշտոնական տվյալների, աշխատում է ավելի քան 4 հազար 600 մարդ։

Փակ, գաղտնի քվեարկությունը սկսվել է դեռ երեկ կեսօրին, և գործադուլի դուրս եկած աշխատակիցների համոզմամբ՝ առաջիկա ժամերին քվեարկողների թիվն էլի կաճի։ Ի դեպ, մի քվեատուփ դրվել է Քաջարան քաղաքի կենտրոնում, մյուսը՝ կոմբինատի տարածքում։

«Արդեն մոտենում է 2000-ին, որը մեզ համար բավական է, որ ցույց տանք, որ մեծամասնություն է։ Մի ամբողջ օր չկա, մենք երեկ ժամը 12-ից սկսել ենք: Դե մենք պետություն չենք, որ կարողանանք կազմակերպել քվեարկությունը, առաջին անգամ ենք անում: 12 ժամվա դրությամբ 42 տոկոս եկել է, ստորագրել: Պարոնա՛յք ղեկավարություն, մի տարածեք նման կեղծիքներ», - ասել է պղնձամոլիբդենային կոմբինատի աշխատակիցներից Շավարշ Մարգարյանը:

Նա նշել է, թե քվեարկությամբ նաև փորձում են ցույց տալ, որ իրենց գործադուլը օրինական է՝ ի պատասխան կոմբինատի ղեկավարության պնդման, թե աշխատանքի չներկայանալով գործադուլ անողները խախտել են օրենսդրությունն ու պայմանագիրը։

Պղնձամոլիբդենային կոմբինատը նախորդ օրերին տարածած հաղորդագրություններում պնդում է, թե գործադուլի դուրս եկած քաղաքացիները աշխատավարձի անիրատեսական բարձրացում են պահանջում՝ սաբոտաժի ենթարկելով կոմբինատի աշխատանքը։ Սպառնալով իրավական գործընթացների շրջանակում պատասխանատվության ենթարկել խախտումներ կատարողներին՝ Հայաստանի թիվ մեկ հարկատուն հրապարակել է նաև որոշ աշխատավարձերի չափեր՝ ֆլոտատոր՝ 399 - 594 հազար դրամ, փականագործ՝ 329 - 580 հազար դրամ, կոնվեյերավար՝ 450 - 480 հազար դրամ (հարկերը ներառյալ)։

Այսինքն՝ սա չհարկված աշխատավարձերի չափն է, ինչը, գործադուլի դուրս եկած աշխատակիցների համոզմամբ, հատուկ է արվել, որպեսզի մոլորեցնեն հանրությանը։

«Այդ գումարի 30 տոկոսը չի ստանում մարդը, փաստացի ինքը քիչ է ստանալու, իսկ իրենք ուզում են ուղղակի մանիպուլյացիա անել, մարդկանց մոտ տպավորություն ստեղծեն, որ տեսեք՝ այս քաջարանցիները ինչ կարգի հղփացած մարդիկ են՝ այդքան ստանում են, էլի պահանջում են», - նշել է Շավարշ Մարգարյանը։

Հայաստանի լեռնագործների, մետալուրգների և ոսկերիչների արհեստակցական կազմակերպությունների ճյուղային հանրապետական միության նախագահ Էդուարդ Փահլևանյանը «Ազատությանը» փոխանցել է, որ ստեղծված իրավիճակը հանգուցալուծելու համար քվեարկության ավարտից հետո, երբ կհաշվարկեն քվեաթերթիկները, կհանդիպեն կոմբինատի ղեկավարությանը։ Արդեն իսկ նախնական պայմանավորվածություն է ձեռք բերվել՝ երեկոյան ժամը 5-ին գործադուլի դուրս եկած մի քանի աշխատակիցների հետ միասին հանդիպել կոմբինատի տնօրեն Անդրեյ Սինիկովի հետ։

«Նաև բանակցություն, որպեսզի պատժամիջոցներ չկիրառվեն աշխատակիցների դեմ», - ասել է նա:

Քվեաթերթիկները, ի դեպ, հաշվելու են Զանգեզուրի պղնձամոլիբդենային կոմբինատի արհմիությունում, որը լեռնագործների արհեստակցական կազմակերպության ճյուղային միության անդամ է։

Պղնձամոլիբդենային կոմբինատից «Ազատությանը» փոխանցել են՝ իրենց դիրքորոշումը կհայտնեն քվեարկության ավարտից հետո։