Սև գործը արեցինք և հիմա զրպարտիչ ենք. բնապահպան

«Սև գործը, բանվորի գործը արեցինք, սկուտեղի վրա մատուցեցինք Ռուբեն Խաչատրյանի կազմակերպությանը և հիմա զրպարտի՞չ ենք»:

Newspress.am-ի հետ զրույցում ասաց բնապահպան Սիլվա Ադամյանն՝ անդրադառնալով իր և «Վայրի բնության և Մշակութային արժեքների» հիմնադրամի (FPWC-ի) անդամների միջև առաջացած տարաձայնություններին:

Հիշեցնենք, որ մարտի 10-ին Արարատի մարզի Արալեզ համայնքի բնակիչ, 44-ամյա Արտյոմ Ավետիսյանը ոչ սթափ վիճակում մտել է Ուրցաձորի կենդանիների վերականգնողական կենտրոն և փորձել «խաղալ» առույծի հետ: Անհաջող խաղն ավարտվել է նրանով, որ առույծը հոշոտել է տղամարդու թևը:

Սիլվա Ադամայնն արձագանքելով դեպքին, հայտարարել է, որ կենդանին մեղք չունի և միջադեպը տեղի է ունեցել տարածքում համապատասխան վերահսկողության բացակայության պատճառով: Ինչն էլ վրդովել է FPWC-ի անդամներին և նրանք իրենց ուղղված մեղադրանքը զրպարտություն են որակել:

«Ես վրդովված եմ, որ բնապահպանության նախարարությունը ոչ մի ձայն չհանեց, թե էդ ո՞ւմ եք ասում զրպարտիչ, գոնե որևէ կերպ արձագանքեին: Ու մտածեցինք՝ ճիշտ կլինի, որ մենք FPWC-ի հետ չաշխատենք»,-մեզ հետ զրույցում ասաց Սիլվա Ադամյանը:

Նա նկատեց, որ մինչ այդ բնապահպանության նախարարության հետ միասին որոշել են կենդանների հետ կապված բոլոր առաջարկներն ու ծրագրերն իրականցնելու նախապատվությունը տրվի FPWC-ին ու այդքանից հետո նման իրավիճակ չէին սպասում:

«Որ ուզում ենք իմանալ, թե ինչո՞ւ է մարդը մտել այդ տարածք, և ի՞նչ գործ ունի խմած մարդը էդ տարածքում, ուրեմն զրպարտի՞չ ենք: Այնտեղ անվտանգությունն ապահովված չէ. ոչ մեկը չի եղել, որ այդ մարդու ձեռքը բռնի ու ասի մի մտի, այդ ո՞ւր ես գնում»,-ասաց բնապահպանը՝ հավելելով, որ իրենց խումբը կմնա, բայց իրենք այլևս չեն զբաղվի այդ կենդանիների հետագա ճակատագրով, քանի որ վիրավորված են:

Նա նաև նշեց, թե չի հասկանում` ի՞նչ է նշանակում զրպարտություն, երբ դեպքն արձանագրվել է: Մարդը կա, գոյություն ունի ու նրան Երեւանի «Հերացի» թիվ 1 համալսարանական կլինիկայում արդեն 2 անգամ վիրահատել են: Հնարավոր է լինի նաև երրորդ վիրահատությունը:

«Նեղացել են, որ ասել եմ հոշոտել է, ես իրենց եմ հարցնում` ճանկռե՞լ է, ասում են ոչ, կծե՞լ է՝ ոչ, բա այդ դեպքում ի՞նչ է արել, եթե չի հոշոտել. փորձում են ինձ հայերեն սովորեցնել: Բա հոշոտել չի՝ ի՞նչ ա, ուսը չկա էդ մարդու»-ասաց Սիլվա Ադամյանը:

Նա վրդովված է Վիկա Մկրտչյանի և հատկապես Վահե Վարդումյանի պահվածքից: Սիլվա Ադամյանի խոսքով՝ այդ երիտասարդն անվայելուչ ձևով է իրեն պահել՝ ֆեյսբուքում տարածելով անպատշաճ մեկնաբանություններ:

Նա հավելեց, որ արտասահմանում որպես բավակնին լուրջ կազմակերպություն էին ընդունում FPWC-ը, բայց ոչ պրոֆեսիոնալ աշխատակազմի պատճառով, այսօր արդեն արտասահմանցիներն անվստահություն են հայտնել այդ կազմակերպության աշխատանքերի նկատմաբ:

«Հնարավորությունը տրվել է, մեր կազմակերպությունն էլ թիկունք է կանգնել, բայց իրենք չեն կարողացել կենդանիների անվտանգությունը ապահովեն: Հիմա էլ ուզում են դատի տալ, բայց ես փաստարկներ ունեմ, վախենալու ոչինիչ չունեմ, թող իրենք մտածեն՝ իրենց պրոբլեմն է»,-եզրափակեց բնապահպանը: