Հովիկ Աբրահամյանի հմայքները Ռուսաստանի վրա չեն ազդել

Հայաստանը կշարունակի դոլարով վճարել ռուսական գազի դիմաց, ռուբլով վճարումների հարցը ռուսական կողմի հետ չի քննարկվում: Երեկ այս մասին հայտնել է Էներգետիկայի և բնական պաշարների նախարար Լևոն Յոլյանը:

Հիշեցնենք, որ դեռևս անցած տարվանից ՀՀ վարչապետ Հովիկ Աբրահամյանը խոսում էր ռուբլով վճարելու ռուսական գազի դիմաց, ինչպես երևում է ռուսները չեն համաձայնել. ռուսական կողմին ձեռնտու է դոլարով առևտուրը:

Հայաստանը իր ներքին խնդիրները լուծելու փոխարեն խնդրում է Ռուսաստանին, այն դեպքում, երբ գազը ռուսական սահմանին հասցվում է մի գնով, բնակչությանը տրվում է ավելի բարձր գնով:

Երևի թե Ռուսաստանում այնքան էլ հիմար չեն, տեսնում են, թե ինչպես է Հայաստանը վարվում ռուսական էներգակիրների հետ, իսկ ինչու պետք է Հայաստանի համար ավելի լավ պայմաններ ներկայացնի, այն դեպքում, երբ Հայաստանն ինքը սեփական ժողովրդի համար նման ժեստ չի անում:

Երևի թե ռուսներն այդպես էլ հասկացրել են, նախ դուք ձեր ժողովրդի համար անհանգստացեք, հետո մենք մի բան կանենք ձեր ժողովրդի համար:

Նշենք նաև, որ խոսք չի գնում ռուսական գազի գինը Հայաստանի համար 165 դոլարից նվազեցնելու մասին, որի համար դեռևս անցած տարի ՀՀ իշխանությունները դիմել էին ռուսական կողմին:

Այնպես, որ վերջին շրջանում Ռուսաստանի մայրաքաղաք այցելությունը էներգակիրների առումով գոնե չի հաջողվել:

Հավելենք, որ շատ է խոսվում, թե շատ արտոնյալներ գազի դիմաց գրոշներ են վճարում, գազի կորուստները հսկայական են, ոլորտում կոռուպցիան անվերահսկելի է. կարճ ասած Հայաստանը գազի հետ կապված խնդիրները բարելավվելու փոխարեն ՌԴ-ին դիմում է՝ մեզ էժան գազ տվեք, մեզ լավ գնով գազ տվեք: ՌԴ-ն էլ ՀՀ վարչապետ Հովիկ Աբրահամյանի առաջարկները պարզապես մերժել է: