Ադրբեջանի ԱԳՆ-ն պատասխանել է Նիկոլ Փաշինյանի հայտարարություններին

Փետրվարի 10-ին հայկական մամուլում հրապարակված հոդվածում ՀՀ վարչապետ Նիկոլ Փաշինյանի՝ այսպես կոչված Արևմտյան Ադրբեջան համայնքի նպատակների վերաբերյալ արված հայտարարությունները նպատակ ունեն խեղաթյուրել իրականությունը և մոլորեցնել համաշխարհային հանրությանը։

Այս մասին ասել է Ադրբեջանի արտաքին գործերի նախարարության մամուլի ծառայության ղեկավար Այհան Հաջիզադեն՝ մեկնաբանելով Փաշինյանի հայտարարությունները Ադրբեջանի կողմից Հայաստանի վրա նախապատրաստվող հարձակման և այսպես կոչված Արևմտյան Ադրբեջան համայնքի նպատակների մասին։

Ըստ Հաջիզադեի` Հայաստանը վերջին երեք տարվա ընթացքում զգալիորեն ավելացրել է իր ռազմական բյուջեն՝ գնելով հարձակողական զենքեր, որոնք վտանգ են ներկայացնում Ադրբեջանի համար։

«Հայաստանի վարչապետը, ով պաշտպանում է ռազմական ներուժ ունենալու իրավունքը, ներկայացնում է մի երկիր, որը 30 տարվա ռազմական ագրեսիայից հետո, չնայած Եռակողմ հայտարարությամբ ստանձնած պարտավորություններին, 44-օրյա պատերազմից երեք տարի անց, Լեռնային Ղարաբաղի տարածքում պահել է ավելի քան տասը հազար վարժեցված կազմավորում՝ հագեցած ծանր զինատեսակներով։

44-օրյա պատերազմից հետո Հայաստանի ռազմական ծախսերն աճել են մոտավորապես երեք անգամ՝ 2021-ի մոտ 600 միլիոն դոլարից 2024-ին հասնելով 1,6 միլիարդ դոլարի։ Ավելին, վերջերս ստորագրված ռազմական պայմանագրերի համաձայն, Հայաստանը գնում է հարձակողական զինատեսակներ, որոնք հիմնականում ի վիճակի են հեռահար հարվածներ հասցնել Ադրբեջանի տարածքում», - ասել է Ադրբեջանի ԱԳՆ ներկայացուցիչը։

Հաջիզադեն նշել է, որ հաշվի առնելով Հայաստանի Սահմանադրության և իրավական ակտերում առկա տարածքային պահանջները, ինչպես նաև ռևանշիզմի աճը, Հայաստանի ղեկավարության կողմից ռազմական ներուժի աճը ուղղակի սպառնալիք է Ադրբեջանի անվտանգությանը։