«Միջանցքի» վերաբերյալ բանակցությունների ընթացքը գաղտնի է պահվում, բանավոր պայմանավորվածություն կա. Ռուստամյան

Ամենամեծ ռիսկայնությունն սկսվում է այնտեղ, երբ Հայաստանը համաձայնում է առանց միջնորդների երկկողմ բանակցել. այստեղից գալիս են բոլոր ռիսկերը։ Այս մասին, այսօր՝ փետրվարի 12-ին, ԱԺ-ում լրագրողների հետ զրույցում նշեց «Հայաստան» խմբակցության պատգամավոր Արմեն Ռուստամյանը:

«Երկկողմ բանակցություն հաղթողի և պարտվողի միջև, բնականաբար, միշտ լինելու է թելադրանքի լեզվով։ Ես մինչև հիմա չեմ տեսել որևէ տեղ, որ Թուրքիան կամ Ադրբեջանը հրաժարվեն հենց այդ միջանցքային իմաստով կապից։ Մեր տխուր փորձը ցույց է տալիս, որ իրենց ասածներն ավելի են իրականանում, քան մեր կողմից հնչող ինչ-որ հավաստիացումները»,- ասաց Ռուստամյանը:

Նրան մտահոգում է, որ ՀՀ իշխանությունները բանակցություններում խոսում են միջանցքի մասին, ու թեև այստեղ արդեն պնդում են, թե իբր միջանցք չեն տալու, բայց թուրքերն ու ադրբեջանցիները միևնույն է՝ դա միջանցք են անվանելու:

«Այսինքն` թուրքերն ու ադրբեջանցիները չգիտե՞ն տարբերությունը որն է: Պարզապես ուզում են մեր այսպես ասած զգոնությունը բթացնել, որ իրականում մենք միջանցք չենք տվել, բայց դե թուրքերն ասում են միջանցք, ոչինչ»,-ասաց Ռուստամյանը:

Դիտարկմանը, որ Հայաստանն ասում է, որ ադրբեջանցիներն ամեն դեպքում անցնելու են բոլոր իրավական ընթացակարգերը մտնել-դուրս գալուց, ընդդիմադիր պատգամավորն ասաց. «Դա չի բռնում Ադրբեջանի հայտարարությունների հետ: Եթե այդպես է լինելու ըստ Փաշինյանի, հիմա չի ստորագրվում: Այսինքն` այստեղի պնդումներն Ադրբեջանի համար անընդունելի են։ Նշանակում է` իրենք փորձելու են նորից իրենց ուզածը ստանալ այնպես, որ դա դառնա անխոչնդոտ Ադրբեջանից Ադրբեջան տեղափոխում»:

Արմեն Ռուստամյանը պնդեց, որ բանակցությունների ընթացքը գաղտնի է պահվում. «Բանավոր խոսակցություններն ընդհանրապես ոչ մի տեղ չեն արձանագրվում, բայց դրանք պարտադիր պահանջ են դառնում Հայաստանի համար: Մենք նաև այդ պրակտիկան ունենք, դժբախտաբար, բանավոր պայմանավորվածությունների ինչ-որ մի հատ նոր մեթոդաբանություն է Հայաստանում կիրառվում: Երկուսն իրար հետ լուրջ վտանգ են մեզ համար, մեկը` առանց միջնորդերի բանակցելը, երկրորդը` բանավոր պայմանավորվածություններով ինչ-որ պրոցեսներ տանելը։ Սրանք խոսում են այն մասին, որ այս իշխանությունները, ըստ էության, այսօր չեն ցույց տվել նվազագույն անգամ ճիգ, որ կարող են դուրս գալ այդ թուրք-ադրբեջանական պարտադրանքից:

Մենք տեսնում ենք, որ իրենք սպասարկում են ամբողջությամբ այդ օրակարգը: Պարզապես իրենք համապատասխան հող են նախապատրաստում հանրային ընկալման համար, որպեսզի հետո պրոբլեմներ չլինեն, բայց նույն խնդիրը պահված իրենց մտքում ունեն և չեն կարող հրաժարվել ադրբեջանական այդ պահանջներից»,- հայտարարեց Ռուստամյանը: