Սամվել Շահրամանյանին ես չեմ ճանաչել, դա շահարկելը լկտիություն է

Արցախում շրջափակման ժամանակ ՀՀ երկրորդ նախագահ Ռոբերտ Քոչարյանը մշտական կապի մեջ է եղել նախկին նախագահներ Արկադի Ղուկասյանի ու Բակո Սահակյանի հետ։

«Գրեթե ամեն օր էինք խոսում, իսկ վերջին մեկ շաբաթվա ընթացքում՝ օրը մի քանի անգամ։ Արայիկ Հարությունյանը հրաժարականի հարցը սկսել է քննարկել մոտ երեք ամիս, մինչև Ղարաբաղի անկումը։ Այն, ինչ կատարվեց վերջին շաբաթում, դա հրաժարականի 3-րդ փորձն էր Արայիկ Հարությունյանի կողմից»,- լրագրողների հետ հանդիպմանն ասաց Քոչարյանն՝ անդրադառնալով ՔՊ-ականների պնդմանը, թե Արցախը «հանձնել» է Արցախի նախագահ Սամվել Շահրամանյանը և որ նրա ընտրությամբ Արցախում հեղաշրջում է տեղի ունեցել։

Նա նշեց, թե Արայիկ Հարությունյանն ասել է, որ ինքն այլևս ազդեցություն չունի, իր խոսքը տեղ չունի, չի ձգում, պրոբլեմ կա և որ իր հրաժարականը ճիշտ է։

«Ամեն անգամ Բակո Սահակյանն ու ևս մի քանի հոգի համոզում էին դա չանել, վերջին անգամ ինքն արդն հավաքել ու հայտարարել է՝ մեկ է՝ անելու է, հրաժարական է տալու, հարցը քննարկման ենթակա չէ։ Առաջարկել է ուղղակի ճիշտ կողմնորոշվել, թե ով կարող է ստանձնել իշխանությունը, սա էր վիճակը»,- նշեց նախագահ Քոչարյանը։

Նրա խոսքով՝ Սամվել Շահրամանյանը միակը չէր, առնվազն երեք հոգու հետ Արայիկ Հարությունյանն անձամբ է խոսել, համոզել, որ դառնան Արցախի նախագահ։ Քոչարյանը, սակայն, անուններ չտվեց, թե ովքեր էին նախագահի մյուս թեկնածուները։

Բակո Սահակյանն ու Արկադի Ղուկասյանը Քոչարյանին պատմել են, որ այդ ամենն Արայիկ Հարությունյանը պատմել է նաև Նիկոլ Փաշինյանին։

«Նիկոլ Փաշինյանը շատ լավ գիտեր, թե ինչ էր կատարվում Ղարաբաղում, ի՞նչ հեղաշրջում, ինչի՞ մասին է խոսքը»,- նշեց նա։

Քոչարյանն ասաց, թե ինքն ընդհանրապես Սամվել Շահրամանյանին չի ճանաչել, իր ընկերներն են խնդրել, որ շնորհավորական ուղերձ հղի նրան ու ինչ-որ տեղ աջակցություն ցուցաբերի։

«Շահարկել այսօր այդ ամենն, ուղղակի անբարոյականություն է»,- հավելեց նա։