Վազգեն Սարգսյանը տեղյակ էր բոլոր մանրամասներին․ Ռոբերտ Քոչարյանը՝ բանակցային գործընթացի մասին

ԼՂ հարցով բանակցային գործընթացը մինչև 1999 թվականը հետևյալ բովանդակությունն ուներ․ համանախագահներն ինչ առաջարկ բերում էին, փորձում էին ինքնորոշման իրավունքն ամուսնացնել տարածքային ամբողջականության հետ: Այս մասին մամուլի ասուլիսի ժամանակ հայտարարել է ՀՀ երկրորդ նախագահ Ռոբերտ Քոչարյանը:

«Ընդհանուր պետության առաջարկն ինչ էր. ինքնորոշված ԼՂ և Ադրբեջանը համատեղ պետություն էին ստեղծում ասիմետրիկ կոնֆեդերացիայի ձևով, բայց միշտ փորձը եղել է ամուսնացնել այս 2 սկզբունքը: Վաշինգտոնում Ալիևն ինձ ասաց՝ «եկեք իրարից պոկվենք»։ Այդ առաջարկի մեջ ես տեսել եմ այդ մասը, որը հնարավորություն էր տալիս ջարդել կարծրատիպը։ Մտածում էի, որ եթե այդ հարցն Ալիևը բարձրացնի համանախագահների առջև, մենք այս կաղապարված իրավիճակից դուրս կգանք։ Այո, բանակցում էինք, ինքը առաջարկում է դա, ասում էի՝ չենք կարող կորցնել Իրանի հետ սահմանը։ Բայց առաջին օրվանից ես չէի կասկածում, որ այդ քննարկումները կբերեն մեզ համար ընդունելի տարբերակի: Ինչի էի համոզված, որովհետև այդ ընթացքում Ալիևը ստանում էր 6 շրջան, կար մոտիվացիա»,- նշել է Քոչարյանը։

Երկրորդ նախագահը հաղորդել է, որ ԱՄՆ-ի կողմից որևէ առաջարկ չի եղել, բանակցային գործընթացում առաջարկները տալիս էինք Մինսկի խմբի անունից:

«Ալիևն ամերիկյան կողմին պատմել էր բանակցային գործընթացի մասին, ամերիկյան պատվիրակությունը եկել էր Հայաստան՝ հասկանալու համար՝ իսկապես դա այդպես է։ Այդ 2 տարի տևած առաջարկը Մինսկի խմբի համանախագահների կողմից եղել է Քի Վեսթում, ուրիշ առաջարկ գրավոր չի եղել»,- ասել է նա և հավելել, որ փաստաթղթերից է իմացել, որ Թուրքիան դերակատարություն ունի այս հարցում։

Քոչարյանը հաղորդել է, որ նախքան ԱՄՆ պատվիրակության Երևան ժամանելը նա Մոսկվայում հանդիպել է Ելցինի հետ․ «Ելցինը վատառողջ էր, ինձ ասեց` Ալիևը շատ գոհ է ձեր բանակցություններից: Ես հարցրեցի՝ մանրամասներին տեղյա՞կ եք, նա ասաց՝ ոչ: Վազգեն Սարգսյանը տեղյակ էր ամենի ինչից, որևէ լուծում հնարավոր չէր իրականացնել առանց Վազգեն Սարգսյանի»,- նշել է Քոչարյանը։