Փաշինյանի հայտարարությունը, Սահմանադրության հանրաքվեի մասին, թուրք-ադրբեջանական տանդեմի հերթական պահանջի ընդունումն է․ Դավիթ Գալստյան

Նիկոլ Փաշինյանի հայտարարությունը, թե նոր Սահմանադրության ընդունման համար հանրաքվե է պետք անցկացնել, թուրք-ադրբեջանական տանդեմի հերթական պահանջի ընդունումն է։ «Եռաբլուր» զինվորական պանթեոնում լրագրողների հետ զրույցում այսպես բնորոշեց Արցախի ԱԺ «Արդարություն» խմբակցության ղեկավար Դավիթ Գալստյանը։

 

Նրա խոսքով՝ Արցախի տարածքը կորսվեց և բռնազավթվեց Ադրբեջանի կողմից հենց Փաշինյանի օգնությամբ, միջնորդությամբ ու անմիջական մասնակցությամբ։

 

«Քանի դեռ չկան բանակցություններ, չկա Արցախի անվտանգության երաշխավորի՝ ՀՀ կողմից ինստիտուցիոնալ պահանջ, որ հարցը մտնի միջազգային հարթակների օրակարգ, Արցախի հարցը քննարկվել չի կարող որևէ այլ դաշտում»,- ասաց Գալստյանը։

 

Անդրադառնալով նոյեմբերի 9-ի փաստաթղթին՝ պատգամավորը նշեց, որ Ադրբեջանն անընդհատ բարձրաձայնում է 9-րդ կետի հարցը, բայց ՀՀ իշխանությունները չեն կարողանում նրան պատասխանել, որ մինչև 9-րդ կետը դեռ 8 կետ էլ կա, որոնք հենց ինքը՝ Ադրբեջանը, կոպտորեն խախտել է։

 

«Նրանք, լինելով պարտության սիմվոլներ, չեն կարողանալու երբևէ այդ հարցը բանակցել, նրանք չեն բանակցում, գլխիկոր վիճակում են և կատարում են հրահանգներ, այլ ոչ թե բանակցությունների ընթացքում գալիս են ինչ-որ եզրահանգման»,- ընդգծեց Գալստյանը։