Ես կյանքում ո՛չ իջացրել եմ, ո՛չ էլ կիջացնեմ ուղևորին` հո թուրք չեմ․ ավտոբուսի վարորդի կտրուկ պատասխանն` ուղևորին

Այնպես ստացվեց, որ այսօր օգտվեցի 58 համարի երթուղուց։ Աղջկաս հետ էի։ Ու քանի որ բոյկոտում եմ ուղեվարձի թանկացման դեմ, ուստի աղջկաս հետ անցանք վալիդատորի կողքով` առանց վճարելու։

Վարորդը ոչինչ չասաց, բայց ուղևորներից մեկին, հավանաբար, «անհանգստացրեց»  բոյկոտս ու մեկ-երկու րոպե անց, հարցրեց վարորդին, թե` հսկիչներ չկա՞ն։

Վարորդը նկատեց, որ նախ հսկիչների համար առանձին գումար պետք է հատկացնեն, և հետո այդ համակարգը մեր երկրի համար դժվար կլինի ներդնել, քանի որ իր հետ նոր խնդիրներ է առաջ բերելու։ 

«Դա մեզ մոտ չի աշխատի»,- ասաց վարորդը հետաքրքրասեր ուղևորին։

Վերջինս չէր նահանջում ու հարցրեց, թե՝ ուղևորների չվճարելն ազդո՞ւմ է վարորդի աշխատավարձի վրա։ 

«Ես ունեմ իմ աշխատավարձը»,-պատասխանեց վարորդը։

Ուղևորը չէր հանդարտվում․ «Բա չվճարող ուղևորներին չե՞ք իջեցնում»։

Վարորդը սրտնեղեց, բայց առանց ձայնի տոնը բարձրացնելու, ասաց․ «Ես կյանքում ո՛չ իջացրել եմ, ո՛չ էլ կիջացնեմ ուղևորին` հո թուրք չեմ»։

Հավանաբար, «թուրք» որակումն սթափեցրեց հետաքրքրասեր ուղևորին և նա այլևս ոչինչ չհարցրեց։

Իսկ ես հատուկ շնորհակալություն հայտնեցի վարորդին և իջա։ 

Ու մտածում եմ՝ ինչ լավ է, որ մեր մեջ մարդ տեսակը չի կորչում։

Արմինե Մկրտումյան