Ինչու՞ Սուրեն Պապիկյանի կուրսեցի Սաշա Կատվալյանի հարևանները դարձան բիզնեսմեն և ինչո՞ւ փողոցներում աղ չէր ցանվել․ Արթուր Չախոյանը փաստեր է ներկայացնում

Ակտիվիստ Արթուր Չախոյանը մի քանի փաստ է ներկայացրել Սաշա Կատվալյանի ղեկավարած «Երևանի աղբահանություն և սանիտարական մաքրում» համայնքային հիմնարկի տենդերները կոնկրետ անձանց տրամադրելու վերաբերյալ և վերջում հռետորական հարց հնչեցրել՝ հիմա պա՞րզ է, թե ինչու փողոցներում աղ չէին ցանել։

«Տիգրան Ավինյանի «ԵԱՍՄ» ղեկավար «Մարսել» Սաշա Կատվալյանի հարևանը նոր բացված ԱՁ-ով մասնակցել է աղի տենդերին։ Հայտերի հրատարակման օրը եղել է 16.10.2024, սակայն Նաիրա Գևորգյան Մերուժանի ԱՁ-ն գրանցվել է 22.10.2024-ին, որից հետո «ԵԱՍՄ»-ի ղեկավար «Մարսելը» պայմանագիր է կնքում իր հարևանի նոր բացված ԱՁ-ի հետ՝ ցախավելների մատակարարման համար, որը իբրև պետք է օրական մատակարարի 4000 հատ ցախավել։

Անդրանիկ Բեդախյան Ռոմանի ԱՁ-ն նույնպես մասնակցել է ցախավելների տենդերին, որից հետո աշխատանքի է ընդունվել «ԵԱՍՄ»-ում՝ որպես օպերատոր։ Նաիրա Գևորգյանը  Անդրանիկ Բաղրամյանի մայրն է, այսինքն՝ «ԵԱՍՄ»-ի ղեկավար «Մարսել» Սաշա Կատվալյանի հարևաններն են։ Միևնույն ժամանակ, մեկ այլ տենդերների մասնակից կա՝ Լուիզա Բեդախյան ԱՁ, որի ազգանունը արդեն ամեն ինչ ասում է։

Ո՞վ կարող է ասել, թե ինչով է պայմանավորված, որ ՀՀ պաշտպանության նախարար Սուրեն Պապիկյանի կուրսեցի «Մարսել» Սաշա Կատվալյանի հարևանները դարձան բիզնեսմեն՝ մասնակցելով «ԵԱՍՄ»-ի տենդերներին նրա ղեկավար նշանակվելուց հետո․ իսկ առաջ, հետաքրքիր է, ինչո՞ւ չէին մասնակցում։  

Հիմա պարզ է, չէ՞, թե ինչու փողոցներում աղ չէին ցանել»,- սոցցանցի իր էջում գրել է Չախոյանը։