Այգեձորի նախկին գյուղապետը դատի է տվել Բերդի համայնքապետարանին
Լրագրող Ոսկան Սարգսյանի գրառումը․
«Այգեձորի նախկին գյուղապետն անհիմն հարստացման գումարը բռնագանձելու պահանջով դատի է տվել Բերդի համայնքապետարանին
Բերդ համայնքի Այգեձոր գյուղի նախկին գյուղապետ Սասուն Սաֆարյանը Տավուշի մարզի առաջին ատյանի դատարան անհիմն հարստացման գումարը բռնագանձելու պահանջի մասին քաղաքացիական հայց է ներկայացրել ընդդեմ Բերդի համայնքապետարանի։ 2025թ․ հունվարի 16-ին Իջևան քաղաքում դատավոր Նարինե Անանյանը որոշել է հայցադիմումը ընդունել դատարանի վարույթ, այդ գործով նախնական դատական նիստեր են կայանում։ Այգեձոր բնակավայրի վարչական ղեկավար Լորիս Միրզոյանին հարցրի, թե ինչին է վերաբերում այդ հայցը։ Նա հայտնեց, որ 1998թվականին,երբ ինքը Այգեձոր համայնքի ղեկավարն էր, գյուղը սնուցող խմելու ջրագիծ են կառուցել։ Հետագայում, երբ համայնքի ղեկավարը Սասուն Սաֆարյանն է եղել, ինչ-որ ծրագրով այդ ջրագծի երկաթյա, 219 մմ տրամագծով շուրջ 1 կմ երկարությամբ խողովակաշարը փոխարինել են պլատմասսե խողովակներով, Սասուն Սաֆարյանի որոշմամբ կտրտել են այդ խողովակները։
Միրզոյանի խոսքերով՝ այդ գործով քննչական կոմիտեն քննություն է իրականացրել,որոշվել է, որ այդ խողովակները պետք է վերադարձվեն Բերդ համայնքին։ Դրան համաձայն չլինելով՝ Սասուն Սաֆարյանը դատարան քաղաքացիական հայց է ներկայացրել։ Ներկայումս այդ խողովակների կեսը գտնվում է Այգեձորում գյուղում, Սասուն Սաֆարյանին պատկանող տարածքում։ Լ․ Միրզոյանը հայտնեց, որ իրենք չեն առարկել, որ համայնքապետարանի ծառայողական «Նիվա» ավտոմեքենան տրվի որպես Սասուն Սաֆարյանի սեփականություն։
2017թվականին, երբ կայացան խոշորացված Բերդ համայնքի ղեկավարի ընտրություններ, Սասուն Սաֆարյանն ինքնառաջադրվել էր որպես համայնքի ղեկավարի թեկնածու, սակայն համայնքի ղեկավար չընտրվեց»։
