Կամո Արեյանն այնքան վաղուց է քաղաքային կառավարման համակարգում, որ արդեն մոռացել է՝ տեխնիկան և ավազն ինքն իրեն ձյուն ու սառույց չեն մաքրում

Կամո Արեյանն այսօր ասել է, որ պատրաստ էին առատ ձյանը՝ տեխնիկան էլ բավարար էր, աղն ու ավազն էլ բավարար էր, բայց առաջին ժամերին տեխնիկան մնացել էր խցանումների մեջ, դրա համար էլ քաղաքը մի քանի ժամ սառցե կոլապսի մեջ էր: Այս մասին գրելէ վերլուծաբան Հակոբ Բադալյանը:

Կամո Արեյանն, ըստ երեւույթին, այնքան վաղուց է քաղաքային կառավարման համակարգում, որ արդեն մոռացել է՝ տեխնիկան եւ ավազն ինքն իրեն ձյուն ու սառույց չեն մաքրում: Դրանք միջոց են, որ արդյունավետ կարող են ծառայել քաղաքին, եթե լինի դրանց կիրառման արդյունավետ կազմակերպում:

Օրինակ, երբ եղանակային տվյալներ են այն մասին, որ երեկոյան քաղաքում սպասվում է առատ ձյուն, առաջինը գալիս է հարցը՝ իսկ ինչպե՞ս կազմակերպել կոմունալ տնտեսության աշխատանքը, եթե այդ ժամերը մեծ հավանականությամբ լինելու են խցանումների ժամ եւ հետեւաբար առաջանալու են հավելյալ բարդություններ:

Ի՞նչ կանխարգելիչ քայլեր ձեռնարկել, ի՞նչ՝ ոչ ստանդարտ տարբերակներ մշակել, որ քաղաքում չլինի մի քանի ժամյա կոլապս:

Պլանավորումը կառավարման կարեւորագույն ասպեկտներից մեկն է, կարելի է ասել՝ «թագուհին»: Առատ ձյան պայմաներում քաղաքը «սառցե թագուհու» գերիշխանության տակ է հայտնվում այն պատճառով, որ բացակայում է կառավարման «թագուհին»՝ արդյունավետ պլանավորումը: