Հիմա Փաշինյանը ՀԿ-ների հետ է հանդիպում. «Հրապարակ»
«Հրապարակ» թերթը գրում է.
«Նիկոլ Փաշինյանն առաջ պարբերաբար հանդիպում էր արտախորհրդարանական ուժերի հետ, հաղորդագրություններ էին տարածում, որ տպավորություն լինի, թե քաղաքական դաշտը պաշտպանում է նրա վարած քաղաքականությունը:
Սկզբում հանդիպողների շրջանակը լայն էր. «Հանրապետություն» կուսակցության նախագահ Արամ Սարգսյան, Հայաստանի քրիստոնեա-ժողովրդավարական կուսակցության նախագահ Լեւոն Շիրինյան, «Միասնական հայրենիք» կուսակցության առաջնորդ Մհեր Տերտերյան, Սոցիալ-դեմոկրատ հնչակյան կուսակցության կենտրոնական վարչության ատենապետ Համբիկ Սարաֆյան, Սոցիալ-դեմոկրատ հնչակյան կուսակցության ատենապետ Սեդրակ Աճեմյան, Հայաստանի եվրոպական կուսակցության նախագահ Տիգրան Խզմալյան, «Ուժը հայրենյաց» կուսակցության ղեկավար Տիգրան Արզաքանցյան, «Հանուն Հանրապետության» կուսակցության նախագահ Արման Բաբաջանյան և այլք։
Սակայն գնալով մասնակիցների շարքերը նոսրացան՝ մնացին ամենահավատարիմները` Տիգրան Խզմալյանը, Արամ Սարգսյանը, Արման Բաբաջանյանը, Լևոն Շիրինյանը: Այս ֆորմատով վերջին հանդիպումը եղել է 2023-ին: Տ․ Խզմալյանից հետաքրքրվեցինք` ինչո՞ւ այլևս Փաշինյանի հետ չեն հանդիպում։ «Գաղափար չունեմ, թե ինչու այդ հանդիպումները տեղի չեն ունենում, բայց, ինչքանով գիտեմ, այժմ հանդիպումներ է ունենում հասարակական կազմակերպությունների հետ:
Տեղյակ չեմ՝ կոնկրետ որ ՀԿ-ների: Պատճառը չգիտեմ, հավանաբար, նա այլևս կարիք չի զգում մեզ հետ քննարկումներ ունենալու: Մենք, ի պատասխան Փաշինյանի, կազմակերպեցինք ԵՄ-ին անդամակցելու ստորագրահավաք, դա էր մեր պատասխանը` նրա հետ չհանդիպելու: Գործում ենք զուգահեռ ուղղություններով: Ինչքանով հիշում եմ դպրոցական տարիների երկրաչափությունից` զուգահեռները չեն խաչվում: Այժմ էլ ես ոչ մի հանդիպման հրավիրված չեմ նրա կողմից»:
Առավել մանրամասն թերթի այսօրվա համարում
