Արշակ Արշակյանի ազատման պատճառը ֆեյսբուքյան հրապարակումն է. մանրամասներ

Օրեր առաջ NEWSPRESS.am-ի հիմնադիր-տնօրեն Արիանա Հովսեփյանը ֆեյսբուքյան իր էջում հրապարակել էր ՆԳՆ տնտեսական վարչության պետ Արշամ Ներսիսյանի` համակարգից ազատման զեկուցագիրը:

Այդ հրապարակումը, ըստ մեր ստացած տեղեկությունների, մեծ անհանգստություն է առաջացրել ՆԳՆ ղեկավարության մոտ:

Դրա հետևանքով ներքին ստուգումներ են սկսել, երեկ պաշտոնից ազատվել է ՆԳՆ մարդկային ռեսուրսների կառավարման վարչության պետ Արշակ Արշակյանը:

Վերջինիս է վերագրվում տեղեկատվական արտահոսքը, սակայն դա Արշակ Արշակյանին վերագրվող միակ «մեղքը» չէ:

Ինչպես շաբաթներ առաջ գրել էր NEWSPRESS.am-ը, Արշակյանն այն ժամանակվա ՆԳ նախարար Վահե Ղազարյանի և այն ժամանակվա փոխնախարար Արփինե Սարգսյանի լուռ համաձայնությամբ, հաշված ժամերի ընթացքում, երկու-երեք աստիճանով բարձրացրել էր յուրային մի քանի ծառայողի պաշտոնները: Պատճառը հասկանալի է` որպեսզի վերջիններս բարձր թոշակի անցնեն:

Այս գործողություններով պետությանը փաստացի պատճառվել է ահռելի նյութական վնաս:

Այս ապօրինի «լավություններից» տեղյակ են նաև իրավապահ մյուս կառույցներում և, ըստ մեր տեղեկությունների, ազատված Արշակյանը շուտով արդեն կկանչվի քննության:

«Գող` սիրտը դող» Ղազարյանն այս մտավախությունը չեզոքացնելու համար փորձում է Արշակյանին իր անձնական բիզնես դաշտ տեղափոխել` այդպիսով լուծելով նրա` իբր անձեռնմխելիության հարցը:

Վահե Ղազարյանի` միամիտ այդ քայլն, իհարկե, չի օգնի Արշակյանին, այլ ընդամենը նրան կապահովի աշխատավարձով:

NEWSPRESS.am-ն առաջիկայում գրավոր հարցմամբ կդիմի ՀՀ Գլխավոր դատախազություն և Հակակոռուպցիոն կոմիտե` ճշտելու, թե նշված ապօրինություններով ինչ ընթացք է տրվելու:

Հ.Գ. Արիանա Հովսեփյանի հրապարակումն ու Ներսիսյանի ազատման դիմումի լուսանկարը` այստեղ