Արա Ֆիդանյանին կհեռացնեն պաշտոնից. ով է հավակնում նրա աթոռին

ՀՀ ներքին գործերի նախարար Արփինե Սարգսյանի` փետրվարի 21-ի հրամանով Խաչատուր Իգիթյանը նշանակվեց ՆԳՆ գլխավոր քարտուղարի տեղակալ։

Ծանոթանալով Իգիթյանի կենսագրությանը` առաջին հերթին նկատում ենք, որ նա բանակում չծառայած հերթական պաշտոնյան է:

32 տարին դեռ չի բոլորել:

Ամուսնացած է, ունի «դուստրս»: «Դուստրս» բառի վերջին «ս» տառը մենք չէ, որ պատահաբար սխալ ենք թողել, հենց այդպես` «դուստրս», նշված է ՆԳՆ պաշտոնական կայքում, նրա կենսագրության մեջ: Ասել է թե` առաջին հայացքից նկատելի է, որ սեփական կենսագրության նկատմամբ անփույթ պաշտոնյայի հետ գործ ունենք:

Մինչ այս, Իգիթյանը ՆԳՆ-ում ընդամենը մեկ տարի` 2024-ի մարտի 28-ից այս տարվա փետրվարի 21-ն է աշխատել: Զբաղեցրել է ՀՀ ՆԳՆ ծառայությունների մատուցման որակի վերահսկողության վարչության պետի պաշտոնը: Հենց ազատման օրն էլ նշանակվել է նոր պաշտոնին: 

Նրա կրթությունն էլ հիմնականում կապվում է տնտեսագիտության և ֆինանսների հետ, իսկ իրավունքին առնչվող կրթությունը ստացել է 2010-2015թթ.-Երևանի «ՄԱՆՑ» համալսարանի իրավաբանական ֆակուլտետում: Ի դեպ, հենց հեղափոխության տարուց` 2018-ից, այդ համալսարանում այլևս բակալավր չի գործում: 

Ինչու ենք այսքան երկար-բարակ անդրադառնում ՆԳՆ գլխավոր քարտուղարի տեղակալի կենսագրությանը: Բանն այն է, որ ըստ NEWSPRESS.am-ի տեղեկությունների, ՆԳ նախարար Արփինե Սարգսյանը որոշել է ազատվել ոստիկանության հնաբնակներից ևս մեկից` նախկին փոխոստիկանապետ, այժմ էլ ՆԳՆ գլխավոր քարտուղար  Արա Ֆիդանյանից: 

Հենց այս հեռանկարով է Հովհաննես Իգիթյանը նշանակվել ՆԳՆ քարտուղարի տեղակալի պաշտոնում:

Ինչպես ասում են` ոտքը մի փոքր պնդացնելուց հետո, հարմար կտեղավորվի շեֆի` էլ ավելի հարմարավետ աթոռին: