Ծառայողական մեքենան շաբաթ-կիրակի «դաչա գնալու՞» , թե՞ հանցագործ բռնելու համար է. ինչու ՆԳՆ խոսնակի ծառայողական մեքենաները չեն կրճատվել

Նիկոլ Փաշինյանի նախաձեռնած ծառայողական մեքենաների կրճատման գործընթացի արդյունքում մինչ այս պահը պետական մարմինների մեքենաների թիվը նվազել է մոտ 40 տոկոսով։

NEWSPRESS.am-ի կատարած հարցումների արդյունքում, պարզվել է, որ, թեև որոշ նախարարություններ հետևել են հանձնարարականին ու լուրջ կրճատումներ արել, սակայն որոշներն էլ պարզապես, «գալոչկա» դնելու համար մի քանի մեքենա են կրճատել`  թոզ փչելով գործադիր մարմնի աչքերին: 

Օրինակ` դատախազությունում, ինչպես մեզ փոխանցեցին, 0 ծառայողական մեքենա: Ասել է թե՝ անգամ դատախազը մեքենա չի ունենա: Մեկական ծառայողական մեքենաներ կմնան արդարադատության, առողջապահության, էկոնոմիկայի, բարձր տեխնոլոգիական արդյունաբերության, կրթության, գիտության, մշակույթի և սպորտի, շրջակա միջավայրի, ֆինանսների, տարածքային կառավարման և ենթակառուցվածքների նախարարություններում։

Մեր հարցման արդյունքում Պաշտպանության նախարարությունից ստացված պատասխանը թեև շատ փակագծեր չէր բացում ու, հստակ թիվ ներկայացված չէր, թե կոնկրետ քանի ծառայողական մեքենա կա նախարարությունում, սակայն պարզ դարձավ, որ, օրինակ, ՊՆ խոսնակը ծառայողական մեքենա չունի:  Փոխարենը ՆԳՆ խոսնակն օգտվում է ծառայողական մեքենայից:

Մեզ հետ զրույցում ՆԳՆ խոսնակ Նարեկ Սարգսյանը նշեց, որ բոլոր վարչություններում մեքենաների կրճատումներ եղել են: Ինչ վերաբերում է կոնկրետ իր ենթակայության ներքո գործող վարչությանը, ապա, ըստ նրա, լինում են հրատապ հարցեր, երբ դեպքի վայր հասնելու համար անհրաժեշտ է լինում մեքենա:

Նկատենք, որ, մեր տեղեկություններով, բացի ՆԳՆ խոսնակին ծառայող Toyota Camry-ից, հասարակայնության հետ կապերի բաժինը ունի ևս 3-4 «ծառայողական» մեքենա: 

Ասել է թե՝ ՆԳ նախարար Արփինե Սարգսյանը շրջանցել է գործադիրի ղեկավարի հանձնարարականն ու թույլ է տալիս, որ իր ենթակայության տակ գտնվող վարչություններում մի քանի ծառայողական մեքենաներ օգտագործվեն:

Թե որքանով են արդարացված ծառայողականների այս թվերը, NEWSPRESS.am-ը փորձեց մեկնաբանություն ստանալ «Իրազեկ քաղաքացիների միավորում» հասարակական կազմակերպության հիմնադիր Դանիել Իոաննիսյանից:

Նա նշեց, որ քանակի առումով չի կարող մեկնաբանություն տալ, քանի որ թվերին չի տիրապետում, սակայն նկատեց, որ այդտեղ խնդիրն այն է, որ մեքենան օգտագործեն ըստ նպատակի:

«Եթե տվյալ պաշտոնյան կարիք ունի ծառայողական ավտոմոբիլի, ապա, կարծում եմ, որ հարկատուները դեմ չեն լինի, որ ինքը դա ունենա: Բայց եթե ծառայողական ավտոմոբիլը զուտ իր երեխաներին, օրինակ, դպրոց տանելու կամ շաբաթ-կիրակի դաչա գնալու միջոց է, ապա դա ընդունելի չէ: Եվ, հետևաբար, ցանկացած պաշտոնյայի հարցով պետք է առաձին քննարկվի՝ իր պարտականություններն արդյունավետ կատարելու համար պե՞տք է ծառայողական մեքենա, թե՞ պետք չի»,- ասաց Իոաննիսյանը:

Նա չգիտի, օրինակ, ծառայողական մեքենա պե՞տք է ՊՆ խոսնակին, թե՞ ոչ, բայց կարծում է, որ թե՛ ՊՆ, թե՛ ոստիկանության հասարակայնության կապերի վարչություններն այնպիսի գերատեսչություններ են, որ մարզերում շատ անելիքներ ունեն և պետք է գնան այնտեղ, որի համար պետք է ավտոմոբիլ կամ գուցե ավտոմոբիլներ:

Իոաննիսյանը չի կարող գնահատել մեքենաների քանակի շատ կամ քիչ լինելը, բայց նկատում է, որ, օրինակ, ՆԳՆ-ում տարբեր հանցագործությունների մասին  կարող  են ռեպորտաժներ պատրաստել, որի համար անհրաժեշտ է լինում գնալ տարբեր ստորաբաժանումներ:

«Ես չգիտեմ՝ 3 մեքենան շա՞տ է, թե՞ շատ չի: Պետք է ուսումնասիրել  և հասկանալ՝ շաբաթվա ընթացքում  այդ մեքենաները ո՞նց են օգտագործվել՝ որ օրը, որ ժամին և ուր են գնացել և, ըստ այդմ, գնահատել՝ 3-ը շա՞տ է, քի՞չ, թե՞ նորմալ»,- ասաց Իոաննիսյանը:

Ըստ նրա, ի վերջո, հիմնական խնդիրն այն է, որ երբեմն ծառայողական մեքենաները մեր վճարած հարկերով օգտագործվում են ոչ թե ծառայությունն ավելի էֆեկտիվ կազմակերպելու, այլ անձնական նպատակի համար:

«Երբ տեսնում եմ, որ իմ վճարած հարկից ոչ թե հանցագործ բռնելու համար է օգտագործվում մեքենան, այլ ոստիկանության  աշխատակցի ընտանիքին տանում է, օրինակ, սուպերմարկետ, այ դրա հետ ես, մեղմ ասած, խնդիր ունեմ»,- ընդգծեց Իոաննիսյանը:

Արմինե Մկրտումյան