Գայանե Ասլամազյանի նախկին ամուսնու նկատմամբ կիրառված խափանման միջոցը փոխվել է՝ լավ վարքի համար

Դերասանուհի Գայանե Ասլամազյանի նախկին ամուսինը՝ պրոդյուսեր Վարդգես Մարկոսյանը, ով հայտնի է նաև «Ջիանի Օնչո», «Դևիդ Պետրոսով», «Լարամ Նարման» անուններով, փետրվարի 24-ին վաղաժամկետ ազատվել է կալանքից: Իսկ ավելի կոնկրետ՝ նրա նկատմամբ կիրառված խափանման  միջոցը փոխվել է 4 ամսվա տնային կալանքի:

Հուլիսի 7-ին Վարդգես Մարկոսյանը վերջնականապես ազատ կարձակվի:

NEWSPRESS.am-ի հետ զրույցում նա ասաց, որ իրեն կալանավայրից 2 տարի շուտ ազատել են՝ լավ վարք դրսևորելու համար:

Հիշեցնենք, որր Վարդգես Մարկոսյանն ու նրա քույրը՝ Իռեն Մարկոսյանը, ԱՄՆ-ում մեղադրվում են թմրամիջոցների ապօրինի շրջանառության և փողերի լվացման համար: 

Ըստ ԱՄՆ արդարադատության դեպարտամենտի՝ Վարդգես Մարկոսյանը խոստովանել է, որ 2014 թ. դեկտեմբերից 2016 թ. հոկտեմբերը 40 կգ կոկաին է տեղափոխել: Ուղարկել է Ավստրալիա՝ թաքցնելով կենցաղային իրերի, օրինակ՝ գազի կաթսաների, օդորակիչների մեջ: Նա նաեւ խոստովանել է, որ փողերի լվացման հարցում իր հանցակիցն է եղել քույրը: Նրանք դա արել են 2014 թ. մայիսից մինչեւ 2019 թ. հունվարը: Խոսքը 3.5 մլն դոլարի մասին է:

Նշվում է, որ երկուսն էլ ընդունել են մեղադրանքները՝ թե՛ Իրեն Մարկոսյանը եւ թե՛ Վարդգես Մարկոսյանը: Նրանք համաձայնել են որպես փոխհատուցում մի քանի հարյուր հազար դոլարի հասնող գումար ու անշարժ գույք հանձնել ԱՄՆ կառավարությանը: Նշվում է, որ Վարդգես Մարկոսյանին սպասվում է 10 տարուց մինչեւ ցմահ, նրա քրոջը՝ որպես հանցակից, մինչեւ 20 տարվա ազատազրկում:

Նկատենք նաև, որ Ջիանի Օնչոյի և Գայանե Ասլամազյանի ամուսնալուծության պատճառը հենց այս կալանավորումն էր: