Լսելն իհարկե ծանր է, բայց առավել ծանր է մտածել տողատակերի մասին. Հակոբ Բադալյանը՝ Ռուբեն Վարդանյանի աուդիոուղերձի մասին

Վերլուծաբան Հակոբ Բադալյանն անդրադարձել է Ռուբեն Վարդանյանի ուղերձին:

Ռուբեն Վարդանյանի ուղերձը թողնում է խիստ հակասական տպավորություն:

Կա հրաժեշտի ուղերձի զգացողություն, եւ այդ զգացողությանն ընդդիմանալու մեծ ցանկություն:

Մյուս կողմից, ըստ իս, ուղերձն իր չափազանց ուժգին էմոցիոնալ լիցքով եւ դրանից բխող ճնշմամբ, այդուհանդերձ ունի այդ միջոցով մտածելու հրամայականն առավել անվրեպ տեղ հասցնելու նպատակ:

Եվ պետք է հուսալ, որ հանրությունը չի բավարարվի միայն տարածելով, այլ կբավարարի նաեւ մտածելու այդ նպատակը:

Ընդ որում, որքան ես եմ կարողանում հասկանալ, Վարդանյանը բավականին հստակ կոչ է անում մտածել ոչ թե իր մասին, այլ խնդիրների, դրանց խորքի մասին:

Լսելն իհարկե ծանր է, բայց առավել ծանր է մտածել այն տողատակերի մասին, որ շոշափում է նա: Ի վիճակի՞ է մեր հանրությունը. դրա առաջատար կամ այդպիսի հավակնություն ունեցող խմբերը՝ ստանձնել այդ առավել ծանրը:

Թե՞ այդուհանդերձ մտքի եւ հոգու ուժը չի բավականացնի անել դա: Մինչդեռ, իմ կարծիքով Վարդանյանի ուղերձը այդ ուժի հրամայականի մասին է, էմոցիայի գոտու «հարմարավետությանը» չհանձնվելու անհրաժեշտության մասին է: