Ոստիկանության զորքերի ծառայողների հետ վերապատրաստվում են քրեական ոստիկանները

Ոստիկանների մասնագիտական գիտելիքների շարունակական կատարելագործումը կարևոր քայլ է պրոֆեսիոնալիզմի բարձրացման և ծառայողական պարտականությունների արդյունավետության առումով։

Պարբերաբար անցկացվող վերապատրաստումները ծառայողներին հնարավորություն են տալիս ձեռք բերել նոր հմտություններ, զարգացնել մարտավարական և տեսական գիտելիքները, որոնք անհրաժեշտ են հանրային անվտանգության պահպանման և իրավապահ գործունեության արդյունավետ իրականացման համար։

ՆԳՆ կրթահամալիրում հերթական հատուկ պատրաստության դասընթացը մեկնարկել էր փետրվարի 24-ին։ Ոստիկանության գվարդիայի համապատասխան պաշտոններում նշանակվելու նպատակով մասնագիտական գիտելիքներն ու հմտություններն են կատարելագործում Ոստիկանության զորքերի ծառայողները։

Հատուկ պատրաստության դասընթացի շրջանակում ծառայողները ուսումնասիրում են թե՛ Ոստիկանության գվարդիայի մարտավարամասնագիտական պատրաստության, թե՛ հարկադրանքի միջոցների իրավաչափ գործադրման և մարդու հիմնարար իրավունքների իրավաչափ սահմանափակման հիմքերի վերաբերյալ հարցեր։

Փետրվարի 25-ից «Աջակցություն Հայաստանում իրավապահ մարմիններին և անվտանգության ոլորտի բարեփոխումներին» ծրագրի շրջանակում Ոստիկանության զորքերի ծառայողների հետ վերապատրաստվում են նաև քրեական ոստիկանները։ Երկշաբաթյա վերապատրաստման դասընթացների ընթացքում Ոստիկանության զորքերի ծառայողները խորացնում են գիտելիքները զանգվածային անկարգությունների հակազդման ուղղությամբ, իսկ քրեական ոստիկանները զարգացնում մասնագիտական գիտելիքները «Օպերատիվ տեղեկատվության վերլուծություն» ու «Օպերատիվ տեղեկատվության սինթեզ» թեմաներով։

Դասընթացներն անցկացնում են Լիտվիայի Հանրապետության հանրային անվտանգության ծառայության օպերատիվ արձագանքման հակահարձակման խմբի 2-րդ ջոկատի մասնագետ, միջազգային փորձագետ Ժիլվինաս Դերեշկևիչուսը, Լատվիայի պետական ոստիկանության գլխավոր վարչության ռեսուրսների և ճգնաժամային կառավարման վարչության հատուկ նշանակության գումարտակի հրամանատարի տեղակալ Ռոլանդս Մարցինկևիչսը, Ոստիկանության բարեփոխումների միջազգային հիմնական փորձագետ Արթուրաս Քեմեզիսը։