Առաջադրվել ենք ես ու դաշնակիցս. «Հրապարակ»
«Հրապարակ» թերթը գրում է.
«Մեր ընտրական գործընթացներում նոր երեւույթ է ի հայտ եկել` միանգամից մի քանի թեկնածու առաջադրելը: Սրա պատճառը, իհարկե, Ընտրական օրենսգիրքն է, ըստ որի՝ քվեների մեծամասնություն չստացած ուժերը կարող են միանալ միմյանց եւ իշխանություն ձեւավորել:
Եվ մենք ունեցել ենք նախադեպեր, երբ ստացած քվեների քանակով որեւէ ուժի զիջող երկու փոքր կուսակցություններ միավորվել են եւ իշխանություն վերցրել տեղական մակարդակում: Այս ամենից «դասեր քաղած» քաղաքական ուժերը նախապես են հոգում կոալիցիոն գործընկերոջ հարցը:
Եթե ավելի պարզ ասենք` քաղաքական ուժը կամ թիմը տվյալ տարածքում մեկից ավելի թեկնածուներ է առաջադրում, որ ընտրություններից հետո միացնեն ստացած մանդատները եւ համայնքում իշխանություն ձեւավորեն: Այդ տրամաբանությամբ են առաջնորդվել Նիկոլ Փաշինյանը եւ ընդդիմադիր որոշ շրջանակներ` Գյումրիում առաջադրելով երկուական, գուցե` անգամ երեք թեկնածու:
Այսպես. իշխանությունը հանդես է գալիս Սարիկ Մինասյանով, բայց արեւմտամետների դաշինքը եթե անցողիկ շեմը հաղթահարի, ապա ՔՊ-ի հետ դաշնակցելու եւ իշխանություն վերցնելու հարցը կլուծվի:
Գյումրիում ասում են, որ նույն մեթոդն են որդեգրել նաեւ Ռոբերտ Քոչարյանի եւ Սերժ Սարգսյանի թիմերը: Ճիշտ է` նրանք իրենց դեմքով հանդես չեն գալիս, բայց Քոչարյանի հետ ասոցացվող թեկնածուներ են համարվում Վարդան Ղուկասյանը եւ Կարեն Սարգսյանը, իսկ Սերժ Սարգսյանի հետ` Ռուբեն Մխիթարյանը եւ Մարտուն Գրիգորյանը»:
Առավել մանրամասն թերթի այսօրվա համարում
