ՆԳՆ-ից ազատված 3381 ծառայողից միայն 8-ն է դատարանի որոշմամբ վերականգնվել. չեն ցանկանում վերադառնալ «եկվոր» նախարարի համակարգ
Հանցավորության աճ, կրակոցներ, բռնություններ ոստիկանների կողմից. սրանք ամենօրյա լրահոսի թրենդային թեմաներն են: Իսկ կցկտուր ու անդեմ պաշտոնական լրահոսով մեզ հրամցնում են ոստիկանական ընթացող բարեփոխումների, նախկին արատավոր երևույթների դեմ իբրև տարվող աշխատանքների մասին:
Բարեփոխումների արդյունքն իրականում արտացոլված է հենց օր օրի գլուխ բարձրացնող կրիմինալ դրսևորումների մասին լուրերում: Ով և ինչու մեր երկրի ներքին անվտանգությունը հասցրեց այս աննախադեպ խայտառակ վիճակին: Ինչ խոսք, ամեն ինչ սկսվեց 2018 թվականի «ոստիկանը մերն է» կեղծ լոզունգով, որով հնարավորինս ամուլ դարձրեցին ուժային այս կառույցը, բայց քանի որ անընդհատ փոխվող ղեկավարները նույն այդ համակարգից էին, քանդման պրոցեսը դանդաղում էր, համակարգը դեռ դիմադրողականություն ուներ:
2023 թվականի հունվարին ձևավորվեց ՆԳ նախարարությունը և խոշոր ցնցումներից խուսափելու համար նախարարի պաշտոնում նշանակվեց նախկին գավառական ոստիկան Վահե Ղազարյանը, ում միակ «առավելությունը» Փաշինյանի համադասարանցի լինելն էր: Իրավական երկրում նա նույնիսկ թաղային տեսուչի չէր ձգտի իր ունեցած կրթական ցենզով:
Ինչևէ, Ղազարյան Վահեն թագուհու դերում էր, իսկ «բարեփոխումների» առաջամարտիկը նրա տեղակալ, արդարադատության նախարարությունից «գործուղված», ոստիկանությունում «եկվոր» Արփինե Սարգսյանն էր: Վերջինս մինչ ՆԳ փոխնախարար նշանակվելը, անձամբ էր գլխավորում այդ «բարեփոխումների» ընթացքը: Հատկանշական է, որ այս կարևոր ուժային կառույցը բարեփոխելու գործը վստահվել էր 30-ը չբոլորած մի աղջկա, ով մինչ այդ ոստիկանության հետ առնչություն չէր ունեցել. փորձագետ էր պրոբացիոն ծառայության ներդրման գործում:
Դասագրքերից դուրս բերված մի քանի իրավաբանական տերմիններ անգիր արած այս չինովնիկը ՆԳ գնալու առաջին օրից սկսեց այն հիմնովին քանդելու գործը: Անցած երկու տարում նա հասցրեց համակարգից ազատել 3381 աշխատակցի ու ծառայողի. մեծամասամբ որակյալ կադրերի, որոնք իր պատկերացումներին չէին համապատասխանում կամ փորձում էին իր «ամենագետ» տեսակի հետ չհամաձայնել: Ազատումները մեծամասամբ իրականացվել են նորմերի խախտմամբ:
ՆԳ նախարարությունից NEWSPRESS.am-ի հարցմանն ի պատասխան նշել են, որ ընդամենը 8 անձ է դատարանի որոշմամբ վերականգնվել: Ակնհայտ է, որ այս թիվը առնվազն հարյուրապատիկ կլիներ, պարզապես ուսադիր կրող մարդիկ միշտ չէ, որ իրենց հանդեպ կատարված անարդարությունը վերականգնելու համար դատարան են դիմում, մի մասն էլ պարզապես չի ցանկացել վերադառնալ համակարգ, որը սկսել են ղեկավարել այդ համակարգի հետ կապ չունեցող և այլ արժեհամակարգ ունեցող անձինք:
