Հ1-ի եթերով անգամ ՔՊ-ականների ֆեյսբուքյան ստատուստներն են ընթերցվել. իշխող ուժի թեկնածուն մեծ աջակցություն է ստացել կառավարությունից․ Դիտորդ
«Ականատես» դիտորդական առաքելությունն ուսումնասիրել և պարզել է` իշխող ուժի թեկնածուն մեծ աջակցություն է ստացել կառավարությունից, Երևանի քաղաքապետարանից, իշխող թիմից և ունեցել է անարդարացի առաջընթաց, անարդարացի առավելություն մյուս թեկնածուների համեմատ։ Դիտորդական առաքելության ներկայացուցիչ Մարիամ Հովեյանը նշում է, որ աջակցությունն արտահայտվել է փողոցների հիմնանորոգմամբ, շտապօգնության մեքենաների հատկացմամբ, Երևանի քաղաքապետարանի աջակցությամբ շների խնամքի կենտրոն հիմնելով և այլ մեթոդներով։
«Ռեսուրսները գերկենտրոնացրել են այս ընթացքում և ՏԻՄ աշխատանքը մի քանի անգամ ավելի մեծ թափով է իրականացվել, այդ ամենը ներկայացվել է որպես ՔՊ արժանիք քարոզչության ընթացքում»,- ասաց դիտորդը։
Մարիամ Հովեյանի ներկայացմամբ` այլ խնդիր է իրավական համակարգի ոչ համաչափ միջամտության դեպքերը, մասնավորապես, որոշ քաղաքական ուժերի ներկայացուցիչների նկատմամբ քրեական վարույթները, ձերբակալությունները, բերման ենթարկելու դեպքերը։ Նրա խոսքով` այս գործողությունները մեծ ազդեցություն են ունենում ընտրողների կարծիքի վրա։
Նա նշեց, որ վարչական ռեսուրս է նաև տեղեկատվական ռեսուրսը։
«Հանրային հեռուստաընկերությունը կողմնակալություն է դրսևորել լուսաբանման ընթացքում, նախընտրական պաշտոնական ժամանակահատվածից առաջ անհամաչափ լուսաբանում է տեղի ունեցել, բնականաբար, ՔՊ օգտին։ Եղել է քարոզչություն, իշխանության ներկայացուցիչներն ավելի հաճախ են ելույթներ, հարցազրույցներ ունեցել, Հ1-ի եթերով անգամ նրանց ֆեյսբուքյան ստատուստներն են ընթերցվել։ Սա վարչական ռեուրսերի չարաշահում է»,- ասաց Հովեյանը։
