Ինքն ուզում է, որ մեզ վախեցնի, բայց ինքը պետք է վախենա, նա խիղճ չունի․ Արա Աբրահամյանը՝ Փաշինյանի մասին

2.5 ժամ առանց պատճառի մնացինք օդանավակայանում։ Այս մասին ասուլիսի ժամանակ հայտարարեց «Ռուսաստանի հայերի միության» նախագահ Արա Աբրահամյանը՝ անդրադառնալով «Զվարթնոց» օդանավակայանում տեղի ունեցած միջադեպին։

Ըստ նրա, իր մուտքի արգելքի պատճառը շատ պարզ է։

«Իմ կարծիքով` դրա պատճառն այն է, որ ես բավականին շատ մասնակցում եմ Հայաստանի քաղաքական և հասարակական գործընթացներին, բարեգործությանը»,- ասաց Աբրահամյանը և շարունակեց. «Երևի ինքը որևէ մեկին մի խնձոր չի տվել, ես չգիտեմ, բայց Աբրահամյան Արան ի՞նչ է արել` փախստականներին մոտ 200 բնակարան է նվիրել` 2-3 սենյականոց»,- ասաց նա։

Արա Աբրահամյանը թվարկեց իր բարեգործական ծրագրերը, որոնք իրականացրել է Արցախի Հանրապետությունում և Հայաստանում և ենթադրեց, որ Փաշինյանը դրա համար է նման ձևով վերաբերում իր հետ։

«Իհարկե, ինքն ուզում է, որ մեզ վախացնի, ուզում է, որ ես վախենամ, բոլորը վախենան։ Գրում են` Աբրահամյանին 3-10 ժամ պահել են, թե եկել եմ թալանելու, 17 մլրդ եմ թալանել, հազար ու մի բան, բայց ինքը պետք է վախենա»,- հայտարարեց Աբրահամյանը և հիմնավորեց, որ Փաշինյանը Սահմանադրություն է խախտում և այլ ապօրինություններ։

Նա նաև նշեց, որ Փաշինյանը խիղճ չունի։

«Մեզ բերել են այն վիճակի, որ հայրենիք հասկացությունը չունենք, մինչև չհասկանանք հայրենիքը, հայրենիքի շահը՝ այս վիճակից դուրս չենք գա»,- ասաց Աբրահամյանը։