«Ինձ ճիշտ կպահեմ»․ Վարդան Ղուկասյանը՝ կառավարության հետ հարաբերությունների մասին

Վարդան Ղուկասյանը խոստանում է՝ կառավարության հետ համագործակցության հարցով, բարիդրացիական հարաբերությունները կպահի։

«Ինձ ճիշտ կպահեմ, բայց քաղաքական առումով իրենց հետ միանշանակ գործ չունեմ»,-ասաց նա։

Ճշտող հարցին՝ եթե Փաշինյանը գա Գյումրի, նա կդիմավորի՞, Ղուկասյանն ասաց. «Եթե վարչապետը գալիս է Գյումրի, ուրեմն արարողակարգից զանգում են, դիմավորեք, պարոն Ղուկասյան, ապա ասեմ՝ ընդհանրապես ոչ մեկին այսպիսի բան չեմ արել, իմ հորս էլ չեմ անում, բայց սուբորդինացիան պահելու համար, ուրեմն ինձ կպահեմ ճիշտ: Եթե հանկարծ մի հատ սխալ վերաբերմունք տեսա այդ հարաբերությունների մեջ, որպես քաղաքապետ երկրորդ անգամ, միանշանակ, չեմ գնալու, ձեռքս չեմ բարձրացնելու, չեմ բարևելու, երեսներին էլ չեմ նայելու, բայց չափը ես միշտ պահելու եմ, սուբորդինացիան պահելու եմ, եթե իրենց չհարգեմ էլ, աթոռը կհարգեմ»։

Վարդան Ղուկասյանը նշեց, որ իշխանության վարած քաղաքականությունը չի ընդունում, բայց քաղաքի հետ կապված, եթե որևիցե մի խնդիր լինի, չի պատրաստվում իր քաղաքի խնդիրները փակել ու մի կողմ դնել։

«Քաղաքի հասանելիքը կբարձրաձայնեմ, եթե չտան, մեծ աղմուկ կհանեմ, կհասնենք մինչև ես չգիտեմ ուր: Անպայման տեր եմ լինելու քաղաքի եկած գումարներին և քաղաքի հասանելիքին, եթե զգամ, որ չեն անելու, միանշանակ աղմուկ եմ բարձրացնելու, պայքարելու եմ, ամեն ինչ անելու եմ»,- ընդգծեց նա: