Ի՞նչ է սպասվում Գյումրիում. կա 3 ճանապարհ. «Հրապարակ»

«Հրապարակ» թերթը գրում է.

«Հանրապետության երկրորդ քաղաք Գյումրիի ընտրողը մարտի 30-ին չնայած իր քայլն արեց՝ մերժելով Նիկոլ Փաշինյանին ու նրա թիմին, սակայն ընդդիմադիր ուժերի ղեկավարները երեկ ողջ օրը չէին կարողանում լեզու գտնել իրար հետ, լուծել Գյումրիում իշխանության ձեւավորման հարցը։ Ընտրությունների արդյունքներով, ինչպես հայտնի է, որեւէ ուժ չի կարող միանձնյա ստանձնել համայնքի կառավարումը, իշխող ՔՊ-ն` Սարիկ Մինասյանի առաջնորդությամբ, վարչական լծակների անհավանական մասշտաբների կիրառմամբ, Գյումրին հոսանքազրկելով` ընդամենը 36 տոկոս «խփեց»: Իսկ ավագանի անցած ուժերը միասին 50 տոկոսից ավելի են եւ կարող են իշխանություն ձեւավորել: Մի ամբողջ օր ողջ հայությունն անհամբերությամբ սպասում էր մեկ մարդու որոշման, եւ այդ մեկ մարդը Մարտուն Գրիգորյանն էր՝ Գյումրու ընտրողների 15 տոկոսի ձայները ստացած թեկնածուն։

Հիշեցնենք․ ընտրությունների արդյունքներով՝ Գյումրու ավագանու մանդատները հետեւյալ կերպ են բաշխվել․ ՔՊ-ն 14 մանդատ կստանա, երկրորդը Վարդան Ղուկասյանն է՝ 8 մանդատ, ապա Մարտուն Գրիգորյանը՝ 6 մանդատով, Ռուբեն Մխիթարյանը՝ 3, եւ Կարեն Սիմոնյանը` 2 մանդատով։ Ռուբեն Մխիթարյանն ու «Մայր Հայաստանի» թեկնածու Կարեն Սիմոնյանը երեկ հայտարարեցին Վարդան Ղուկասյանին միանալու մասին, սակայն դա բավարար չէ մեծամասնություն ունենալու համար։ Մարտուն Գրիգորյանը երեկվա դրությամբ դիրքորոշում չէր հայտնել` անհետացել էր ռադարներից, զանգերին չէր պատասխանում, սակայն մեզ վստահեցրին, որ կողմերի միջեւ բանակցություններ են ընթանում։

Մարտուն Գրիգորյանը Սերժ Սարգսյանի ղեկավարած «Պատիվ ունեմ» խմբակցության պատգամավոր է, առաջադրվել է «Մեր քաղաքը» դաշինքով, որը ձեւավորվել է երկու կուսակցության՝ Արթուր Վանեցյանի «Հայրենիքի» եւ Երվանդ Թարվերդյանի «Միացյալ Հայաստանի» կողմից։ Նրա ղեկավարած դաշինքը ստանում է 6 մանդատ։ Եվ քանի որ ՔՊ-ին ընդդիմադիրներից ոչ մեկը չի ուզում միանալ, իսկ ընդդիմադիր ուժերը՝ միավորվելու դեպքում կարող են Գյումրիում իշխանություն վերցնել, ուստի, կարելի է ասել, որ ամեն ինչ կախված է Մարտուն Գրիգորյանից։

Պարզ է, որ շատ բարդ է լինելու Վարդան Ղուկասյան-Մարտուն Գրիգորյան միավորումը, եւ դա ի սկզբանե էր հայտնի, որովհետեւ նրանց միջեւ «արյան վրեժ» կա, Վարդանիկի հետ համագործակցությանը հատկապես կատեգորիկ դեմ է Մարտուն Գրիգորյանի ազգուտակը։ Իշխանությունն էլ իր հերթին ձեռքերը ծալած չի նստել՝ փորձում են մարդագողությամբ, նաեւ քրեական հետապնդումների սպառնալիքներով լուծել իշխանության հարցը։

Իսկ Գյումրիում իշխանության հարցի լուծման մի քանի տարբերակ էին երեկ քաղաքական կուլիսներում քննարկում: Առաջինը, որ Մարտուն Գրիգորյանը մի կողմ դնի միջանձնային բոլոր տարաձայնությունները եւ միանա Վարդան Ղուկասյանին՝ ՔՊ-ին զրկելով Գյումրիում իշխանության գալու հնարավորությունից: Մարտուն Գրիգորյանը նման որոշում կայացնելուց հետո կարող է դուրս գալ քաղաքական մեծ կապիտալով՝ առաջիկա համապետական ընտրություններին այն օգտագործելու շանսով: Հանուն արդարության նշենք, որ Վարդան Ղուկասյանը լայն համագործակցությանը խանգարող հայտարարություններ է անում․ երեկ նա հայտարարեց, որ ցանկացած միավորման պարագայում քաղաքապետի եւ փոխքաղաքապետի պաշտոնները չի զիջելու գործընկերներին եւ դա բացատրեց նրանով, որ եթե իրեն ձերբակալեն, պիտի վստահ լինի, որ իր լիազորությունները ստանձնողները գործարքի չեն գնա ՔՊ-ի հետ, իսկ իր թիմում հենց այդպիսի մարդիկ են` նրանք էլ պետք է փոխքաղաքապետի պաշտոն զբաղեցնեն։ Եվ ընդդիմադիրների համագործակցության շանսերն այս նախապայմաններից փոքրանում` առաջ են մղվում լուծման մյուս տարբերակները:

Դիցուք, ՔՊ-ն կարող է մարդագողությամբ համայնքի ղեկավարի ընտրության երկրորդ փորձի ժամանակ Սարիկ Մինասյանին քաղաքապետ դարձնել։ Եթե առաջին փորձի ժամանակ օրենքը պահանջում է, որ քաղաքապետ ընտրվում է ավագանու անդամների պարզ մեծամասնության քվեով, այսինքն՝ 33 հոգանոց ավագանուց 18-ի քվեն բավարար է, ապա քաղաքապետի ընտրության երկրորդ փուլում, որն առաջինից երկու շաբաթ անց է նշանակվում, հարկավոր է 17 ձայնով քվորում ապահովել, իսկ քաղաքապետ կարող է ընտրվել ընտրության մասնակիցների պարզ մեծամասնության ձայներով։ Այսինքն՝ 14 մանդատ ունեցող ՔՊ-ին ընդամենը երեք ավագանի է պետք, որոնք կարող են սոսկ ֆիզիկական ներկայությամբ քվորում ապահովել, եւ եթե անգամ չընտրեն իշխանության թեկնածուին` դեմ քվեարկեն, ՔՊ-ի ձայները բավարար կլինեն, որ մեծամասնության ձայնով, այսինքն` 9 կողմ քվեարկությամբ իրենց թեկնածուին դարձնեն քաղաքապետ։

Երրորդ տարբերակը, որն ամենահավանականն է համարվում, նոր արտահերթ ընտրություններն են․ եթե ընդդիմադիրներից որեւէ մեկը չի տրվում իշխանության շանտաժներին, չեն մասնակցում ավագանու նիստերին, ավագանին լուծարվում է, քաղաքապետի ԺՊ է նշանակվում` հայտարարվում են նոր ընտրություններ։ 

Կա նաեւ չորրորդ ճանապարհը, որը քիչ հավանական է, ՔՊ-ն աջակցի, որ Մարտուն Գրիգորյանը դառնա քաղաքապետ, հետո մարդագողությամբ նրան անվստահություն հայտնեն ու իրենց թեկնածուով փոխարինեն, ինչպես արեցին Սամվել Բալասանյանի դեպքում։

ՀԳ․ ՔՊ-ում երեկ մեռած էին` թաղած չէին, Փաշինյանը թեպետ ֆրակցիայի հետ չէր խոսել, սակայն պատգամավորները ներքին չաթերում քննարկել էին ընտրությունները, դժգոհել արդյունքներից՝ սպասելով, որ այս պարտության համար առաջիկայում Փաշինյանը շան լափ է թափելու իրենց գլխին։

ՀԳ 1. Երեկ կեսօրից հետո Մարտուն Գրիգորյանը հայտարարեց. «Սիրելի գյումրեցիներ, վերահաստատում եմ ասածս` ՔՊ-ն Գյումրիում քաղաքապետ չի ունենալու` դա հաստատ է»:

Առավել մանրամասն թերթի այսօրվա համարում