Ինքնաթիռների ուղևորների՝ ելքի համար սահմանված պետտուրքի չվճարման արտոնությունը կերկարաձգվի. «Փաստ»

«Փաստ» օրաթերթը գրում է.

«Տարածքային կառավարման և ենթակառուցվածքների նախարարությունն առաջարկում է լրացում կատարել «Պետական տուրքի մասին» օրենքում: 2019 թ. դեկտեմբերի 9-ին ««Պետական տուրքի մասին» օրենքում լրացում կատարելու մասին» ՀՕ-258-Ն օրենքի ընդունմամբ «Պետական տուրքի մասին» ՀՕ-186 օրենքի 29-րդ հոդվածում կատարվեց լրացում, համաձայն որի, օդային տրանսպորտով մեկնող այն ֆիզիկական անձինք, որոնք առևտրային ավիափոխադրումներ իրականացնող ավիաընկերությունների միջոցով մեկնում են առաջին թռիչքի մեկնարկի պահին նախորդող վերջին 12 ամիսներին չսպասարկված IATA կոդով օդանավակայաններ, օգտվում են օրենքի 20-րդ հոդվածի 1-ին մասի 30-րդ կետով սահմանված օդային ուղևորների ելքի համար սահմանված պետական տուրքի վճարումից ազատվելու արտոնությունից։

Օրենքում նշված լրացման արդյունքում միջազգային բյուջետային, ինչպես նաև տեղական (այդ թվում՝ նոր ստեղծված) և միջազգային դասական ավիաընկերություններ սկսեցին մինչ այդ չսպասարկված ուղղություններով չվերթեր իրականացնել Երևանի «Զվարթնոց» օդանավակայան կամ «Զվարթնոց» օդանավակայանից դեպի նոր ուղղություններ։

COVID-19 համավարակի շրջանից հետո Հայաստանի օդանավակայաններում արձանագրվեց ուղևորահոսքի արագ վերականգնում։ Այսպես, եթե 2019 թ. արդյունքներով օդանավակայաններում ուղևորահոսքը կազմել էր մոտ 3,2 մլն ուղևոր, ապա 2022 թվականին ուղևորահոսքը կազմեց մոտ 3,7 մլն, 2023 և 2024 թթ.՝ մոտ 10,76 մլն (համապատասխանաբար՝ 5,41 և 5,35 մլն ուղևոր), արձանագրելով միջին տարեկան մոտ 11,5 տոկոս աճ Covid-19-ի համավարակի տարիները (2020-2022 թթ.) ներառյալ, և միջին տարեկան շուրջ 28,4 տոկոս աճ՝ չներառելով 2020-2022 թթ. ցուցանիշները։

Օրենքի նշված փոփոխություններով պայմանավորված արտոնությունները սկսեցին կիրառվել նոր ուղղություններով մեկնող ֆիզիկական անձանց համար 2020 թ. հունվարից՝ համաձայն կառավարության 2019 թ. դեկտեմբերի 26-ի թիվ 1936-Ն որոշման՝ 3 տարի ժամկետով + 2 տարի երկարաձգման հնարավորությամբ։ Օրենքով և որոշմամբ տրամադրված արտոնությունների ժամկետները 2025 թվականից սկսած ավարտվում են, ինչը կարող է բացասական ազդեցություն ունենալ տվյալ ուղղություններով հիմնականում բյուջետային ավիաընկերությունների կողմից իրականացվող չվերթերի իրականացման շարունակականության ապահովման տեսանկյունից։

Ուղևորահոսքի աճի բարձր տեմպը պահելու, ինչպես նաև արդեն իսկ հաստատված նոր ուղղություններով չվերթերի հաճախականությունների բարձր մակարդակը ապահովելու նպատակով նախագծով առաջարկվում է օրենքով նախատեսված օդային ուղևորների ելքի համար սահմանված պետական տուրքի վճարումից ազատվելու արտոնության տրամադրման ժամկետի երկարաձգումն իրականացնել մեկ և ավելի անգամ՝ ամեն անգամ 24 ամիս ժամկետով՝ ապահովելով երկարաձգման համար անհրաժեշտ պահանջների կատարումը՝ համաձայն որոշման։

Ակնկալվում է ապահովել երկու տասնյակից ավելի ուղղություններով, որոնցով օդային ուղևորները օգտվում են օրենքով նախատեսված օդային ուղևորների ելքի համար սահմանված պետական տուրքի վճարումից ազատվելու արտոնությունից, իրականացվող չվերթերի շարունակականությունը և ուղևորահոսքի բարձր մակարդակը։

Առավել մանրամասն թերթի այսօրվա համարում