Շաքարախտով երեխաները և նրանց ծնողները կանգնել են ծանր խնդիրների առաջ. Անուշ Պողոսյան

Շաքարախտով երեխաները և նրանց ծնողները կանգնել են ծանր խնդիրների առաջ։ Այս մասին իր էջում գրել է Առողջության իրավունք ՀԿ-ի նախագահ Անուշ Պողոսյանը:

Նա, մասնավորապես, նշել է. «Մանկական էնդոկրինոլոգիական դիսպանսերային ծառայությունը   «Մուրացան» համալսարանական կլինիկայում է, որտեղից բուժառուները ստանում են դեղորայք և բժշկական օգնություն։ Մարզերում մանկական էնդոկրինոլոգների բացակայությունը, որը ոչ թե բժիշկ չունենալու արդյունք է, այլ ֆինանսավորման տրամադրման, բերել է նրան, որ դեղորայք ստանալու համար ամեն ամիս ծնողները կտրում-անցնում են հարյուրավոր կիլոմետրեր, որ այդ կենտրոնից ստանան դեղորայք, որից կախված է իրենց երեխաների կյանքը։

Եթե նախկինում գոնե 3 ամսվա չափաբաժին էին տալիս, ապա հիմա հաճախ 1 ամսվա չափաբաժին է տրվում․․․․ Ըստ տեղեկությունների, այս իրավիճակը այնքան անցանկալի է եղել փորձառու և գործին նվիրված Մուրացանի էնդոկրինոլոգների համար, որ նրանցից արդեն 4 -ը ազատվել աշխատանքից, մի քանիսն էլ պատրաստվում են․․․

Ի դեպ, 1 բուժառուի խորհրդատվության և բուժման համար բժիշկին կլինիկան վճարում է 160 ՀՀ դրամ։ Հիմա ուզում եմ հարցնել ՀՀ առողջապահության նախարարին՝ ինչպե՞ս կտնօրինեիք 160 ՀՀ դրամը, եթե լինեիք բժիշկ-գիտությունների թեկնածու։ Զարմացած եք՞, դրա մասին պրոֆեսորը Ձեզ չի զեկուցե՞լ․․․․․

Հ․Գ․ Մի փոքր մարդասեր գտնվեք, այդ երեխաները մեր ապագան են, Դուք խոստացել եք  «ապագա կա», որը այս երեխաների համար հնչում է  «Խնդիրներ կան»․․․․»