ՀՀ-ում 437 դպրոցից միայն 138-ում է հաջողվել տնօրեն նշանակել. ԿԳՄՍ նախարար

ՀՀ-ում 437 դպրոցից միայն 138-ում է հաջողվել տնօրեն նշանակել նոր ընթացակարգով։ Այդ մասին ՀՀ կառավարության նիստի ժամանակ հայտարարեց ՀՀ ԿԳՄՍ նախարար Ժաննա Անդրեասյանը։

Նրա համար սա լուրջ խնդիր է, որը վկայում է ոլորտում առկա բազմաթիվ խնդիրների մասին։

«2023 թ. մեկնարկած այս գործընթացն ի հայտ է բերել բազմաթիվ խնդիրներ ոլորտում։ Մասնավորապես, այս պահին արդեն 437 դպրոց կամ պետական դպորցների շուրջ 32 տոկոսն անցել են կառավարման նոր ձևաչափի, որոնցից տնօրեններ են նշանակվել միայն 138 դպրոցներում։ Զարգացման ծրագրերի փորձաքննության գործընթացը դրական հաղթահարել է հավակնորդների շուրջ 12 տոկոսը, հարցազրույցի փուլը` շուրջ 38 տոկոսը, ինչը վկայում է ոլորտում կարողությունների զարգացման լուրջ խնդիրների մասին», նշեց Անդրեասյանը:

Նա տեղեկացրեց, որ դպրոցների տնօրենների համար սահմանվել են բովանդակային նոր պահանջներ, ներդրվել է եռափուլ համակարգ, որի շրջանակում հավակնորդներն անցնում են հավաստագրման գործընթաց, այնուհետև ներկայացնում զարգացման ծրագիր կոնկրետ հաստատության համար, որտեղ որ ցանկություն ունեն տնօրեն աշխատել։
Այնուհետեև, զարգացման այդ ծրագիրն անցնում է անկախ փորձաքննություն մրցույթով ընտրված կազմակերպության կողմից: Արդեն վերջին փուլում, ըստ նախարարի, հավակնորդը մասնակցում է հարցազրույցի նախարարության և լիազոր մարմինների համատեղ հանձնաժողովում: