ՀՀ դեսպանը Հունաստանի կրթության նախարարին «Ակադեմիական քաղաք» նախագիծն է ներկայացրել

Ապրիլի 3-ին Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպեց Հունաստանի կրթության, կրոնական հարցերի և սպորտի նորանշանակ նախարար Սոֆիա Զախարակիին։
 

Դեսպան Մկրտչյանը շնորհավորեց Սոֆիա Զախարակիին նախարարի նշանակման կապակցությամբ և նրան մաղթեց հաջողություններ պաշտոնավարման ընթացքում։
 

Կողմերը քննարկեցին կրթության ոլորտում հարաբերությունները ընդլայնելու հնարավորությունները։ Անդրադարձ եղավ Հունաստանում, մասնավորապես Աթենքի և Կոմոտինիի համալսարաններում, հայոց լեզվի և հայագիտության դասավանդման արդեն մեկնարկած ծրագրերին, ինչպես նաև Հայաստանում հունարեն լեզվի զարգացման ծրագրերին, մասնավորապես Երևանի պետական համալսարանում և Վ․ Բրյուսովի անվան պետական համալսարանում։ Դեսպան Մկրտչյանը ներկայացրեց հայաստանցի ուսանողների համար հին հունարենի դասավանդման հնարավոր տարբերակներ քննարկելու առաջարկություն։
 

Քննարկվեցին կրթամշակութային ծրագրերի իրականացման գործընթացները համապատասխանաբար Հայաստանում և Հունաստանում։ Նախարար Զախարակին նշեց, որ այդ թվում և կրթամշակութային հիմնադրամների, օրինակ Ստավրոս Նիարխոսի կամ Օնասիսի հիմնադրամների, միջոցով Հունաստանը մեծ փորձ ունի այդ ուղղությունները միատեղելու։ Դեսպան Մկրտչյանը ներկայացրեց ԿԳՄՍ կողմից այս ուղղությամբ արձանագրած որոշ նախագծեր և առաջարկեց առաջիկա բարձրաստիճան այցելությունների ընթացքում դիտարկել հունական փորձը։ Դեսպանը ներկայացրեց նաև կառավարության նախաձեռնած Ակադեմիական քաղաք նախագծի հայեցակարգը։
 

Քննարկվեցին առաջիկայում բարձրաստիճան այցելությունների անցկացման հնարավորությունները, ինչպես նաև իրավապայմանագրային դաշտը կրթության և գիության ոլորտներում ընդլայնելու հեռանկարները։