Ծաղկազարդի օրը եկեղեցիներում կմատուցվի բաց խորանով Սուրբ Պատարագ. (տեսանյութ)

Մարտի 20-ին, Հայ առաքելական եկեղեցին տոնելու է Ծաղկազարդը, բոլոր եկեղեցիներում կմատուցվի բաց խորանով Սուրբ Պատարագ, որի ավարտին կկատարվի Մանուկների օրհնության կարգ: «Անդրադարձ» մամուլի ակումբում լրագրողների հետ զրույցում Արարատյան հայրապետական թեմի Բյուրավանի Ս. Գրիգոր Լուսավորիչ եկեղեցու հոգեւոր հովիվ Տեր Ղազար քահանա Պետրոսյանը հիշեցրեց, որ Ծաղկազարդը խորհրդանշում է Քրիստոսի հաղթական մուտքը Երուսաղեմ: Մանուկները եւս խանդավառությամբ փառաբանում են նրա մուտքը: Տիրոջ հակառակորդներն ասացին` «լռեցրեք այդ մանուկներին»: Իսկ Քրիստոս ասաց` «Ճշմարիտ եմ ասում ձեզ` եթե մանուկները լռեն` քարերը կաղաղակեն»,-մանրամասնեց նա:

Ազգագրագետ Հրանուշ Խառատյանն էլ խոսեց տոնի ժողովրդական խորհդանիշի մասին:

Նա նաև հիշեցրեց, որ Ծաղկազարդի օրը երիտասարդները ուռենու ճյուղեր էին կտրում և բերում եկեղեցի: Վառվող մոմերի պայծառությամբ լուսավորված եկեղեցում քահանան օրհնում էր ճյուղերը, որից հետո դրանք բաժանվում էին ներկաներին:

Այնուհետև, վառված մոմերով դուրս գալով եկեղեցուց, նրանք շտապում էին գերեզմանատուն: Այնտեղ մոմերն ամրացնում էին իրենց հանգուցյալի գերեզմանաքարին, իսկ օրհնած ճյուղերը տուն էին տանում: Այդ ճյուղերին վերագրվում էր չարխափան զորություն: Մարդիկ այդ ճյուղերը պահում էրն տանը, դնում ամբարների և կարասների մեջ, որ հիվանդությունները վերանան, և տարին առատ լինի բերք ու բարիքով:

Ծաղկազարդի ընթրիքի հիմնական բաղկացուցիչներն էին` կարմիր ձուն, ձկնեղենը, փլավը, ձվով տապակված բանջարեղենը, վերջում` թանձր եփած թանով սպասը կամ կաթով կորկոտաճաշը: Հում կանաչեղենից կարևորագույնը աղբյուրների մոտ աճած դաղձն էր, շատերն էլ եփած կանաչեղենը տանում էին եկեղեցի և բաժանում որպես մատաղ: Այդ օրը կերել են` քացախով համեմված ոսպապուր, օձի թթու (կաղամբի թթու էին եփում), սամիր (կաթով եփված կոտոտաճաշ) և աղամաղ: Աղամաղը սմբուկի գլխիկի կանաչ կեղևն է, որ չորացնում ու պահում էին այդ օրվա համար:
Մանրամասները` տեսանյութում