Դուք ճանապարհներ կառուցում եք Ադրբեջանին հանձնելո՞ւ, թե՞ մեր համար. Էդգար Ղազարյանը՝ ՏԿԵ փոխնախարարին

«Կարո՞ղ եք ներկայացնել վիճակագրություն, թե ձեր կառավարման շրջանում 2020 թվականից հետո քանի կիլոմետր ինչ նշանակության ճանապարհներ են հանձնվել թշնամուն»։ Այս մասին կառավարության նիստում ասաց հասարակական-քաղաքական գործիչ Էդգար Ղազարյանը՝ դիմելով ՏԿԵ փոխնախարար Քրիստինե Ղալեչյանին։

Ղազարյանը նկատեց, որ փոխնախարարը ներկայացնում է մի կառավարություն, որի գործողությունների հետևանքով թշնամուն է հանձնվել ճանապարհների հարյուրավոր կիլոմետրեր։

«Փաշինյանը 2024 թվականի օգոստոսից պարբերաբար հայտարարում է, որ համաձայն Ադրբեջանի Հանրապետության գործող սահմանադրության Հայաստանի ներկա տարածքի 60-70%-ը ունի ադրբեջանական պատկանելիություն։  ՏԿԵ-ն ճանապարհաշինական ծրագրեր իրականացնելիս այդ հայտարարությունները հաշվի առնում է։ Այսինքն՝ դուք ճանապարհներ կառուցում եք Ադրբեջանին հանձնելո՞ւ, թե մեր քաղաքացիներին ծառայություններ մատուցելու համար»,-հարցրեց Ղազարյանը:

Արձագանքելով նրան՝ Ղալեչյան նշեց, որ կառավարության ծրագրերը  իրականացնում են ճանապարհների անվանացանկով՝ կառավարության որոշմամբ։

«Այդ անվանացանկում ներառված ճանապարհներն են հանդիսանում ճանապարհային ցանցի մաս. ուրիշ մեկնաբանություն ես չունեմ»,-պատասխանեց Քրիստինե Ղալեչյանը։

Էդգար Ղազարյանը հարցրեց, թե հիշատակված անվանացանկի մեջ ներառվա՞ծ է Երևան-Մեղրի միջպետական ճանապարհը, և փոխնախարարը այսօր կարո՞ղ է լսումներից հետո անվտանգ երթևեկել միջպետական ճանապարհի Գորիս-Կապան հատվածով:

«Կերթևեկեմ այն ճանապարհով, որը անցնում է Տաթևով մինչև Ագարակ»,-արձագանքեց փոխնախարարը։