Ֆուտբոլ խաղում են 11 հոգով, թիմային խաղ չտեսա․ Մովսիսյանը՝ Վրաստանից կրած պարտությունների մասին

Հայաստանի ազգային հավաքականի և «Կրասնոդարի» նախկին հարձակվող Յուրա Մովսիսյանը լայնածավալ հարցազրույց է տվել Metaratings.ru-ին՝ խոսելով Հայաստանի ընտրանու անհաջողությունների մասին։

Ինչու Հայաստանի ընտրանին պարտվեց Վրաստանին

«Պատճառը մեկը չէ, այլ մի քանի գործոնների համադրություն։ Նախ, բացակայում էին առանցքային ֆուտբոլիստները՝ Սպերցյանն ու Սելարայանը։ Բացի այդ, Վրաստանի ընտրանին ներկայումս լուրջ առաջընթաց է գրանցել։ Հայաստանի ընտրանու ֆուտբոլիստները շատ անվստահ խաղ ցուցադրեցին, մի շարք խնդիրներ խոչընդոտեցին նրանց լավ խաղին։ Արդյունքում մենք տեսանք այն, ինչ տեսանք։ Ինձ համար հաշիվն էական չէր, ավելի ցավալի էր տեսնելը Հայաստանի ընտրանու խաղամակարդակը։ Ցավով տեսա, որ խաղացողներն անորոշ էին գործում։

Երբ ես էի խաղում, բոլորովին այլ հոգեվիճակով էի մոտենում հավաքականի հանդիպումներին։ Այո, բոլորն էլ կարող են սխալվել։ Բայց երբ մեկն արտահայտված սխալ է անում, մյուսները պետք է աջակցեն, վերցնեն պատասխանատվությունը, լինեն թիմ։ Դա չտեսա։ Երբ մեկը սխալվում էր, մյուսները չէին աջակցում։ Ցավալի էր տեսնել այդ պատկերը։ Դա հստակ հոգեբանական խնդիր է։ Նոր մարզիչ է եկել, ֆուտբոլիստները դեռ չեն հարմարվել նրա պահանջներին։

Բայց երբ ես էի խաղում, հոգեբանությունը իմ ամենամեծ ուժեղ կողմն էր։ Ցավոք, դա վերջին հանդիպումներում չտեսա։ Չեմ ասում, որ բոլորը վատ վիճակում էին։ Կային խաղացողներ, ովքեր լավ պատրաստված էին։ Բայց երբ բոլորն այդպես չեն, հաղթելը դժվար է»։

Ով դուր եկավ իր տրամադրվածությամբ

«Դուր եկավ Տիգրան Բարսեղյանը։ Նրանից երևում է, որ եվրոպական ակումբում է խաղում։ Կցանկանայի նաև առանձնացնել Թիկնիզյանին։ Նաիրը թե՛ ֆիզիկապես, թե՛ հոգեբանորեն շատ լավ մարզիկ է։ Բայց բոլորս գիտենք՝ ֆուտբոլ 11 հոգով են խաղում, ոչ թե երկուսով։ Իսկ ես թիմային խաղ չտեսա»։