ՔՊ-ում թեժ մարտեր են սպասվում. «Հրապարակ»
«Հրապարակ» թերթը գրում է.
««Քաղպայմանագրում» բուռն և հետաքրքիր օրեր են սպասվում։ Բանն այն է, որ երեկ Ազգային ժողովի աշխատակազմը դրական եզրակացություն է տվել իշխող խմբակցության պատգամավոր Անդրանիկ Քոչարյանի վարքի վերաբերյալ էթիկայի հանձնաժողով ստեղծելու մասին ընդդիմադիր խմբակցությունների դիմումին։ ԱԺ «Հայաստան» և «Պատիվ ունեմ» խմբակցությունները դիմել էին ԱԺ աշխատակազմին՝ էթիկայի հանձնաժողով ձեւավորելու և Անդրանիկ Քոչարյանի՝ լրագրող Հռիփսիմե Ջեբեջյանի նկատմամբ դրսեւորած վարքը քննելու համար։ Հիշեցնենք, որ մարտի 20-ին, խորհրդարանում լրագրողների հետ ճեպազրույցի ժամանակ Անդրանիկ Քոչարյանը պահանջել է լրագրողին նախ հեռանալ իր կողքից, հայտարարել է, որ նա իրեն խանգարում է, ապա հորդորել է մաքրել շուրթերը: «Ես առաջնորդվում եմ հոգևորականի այն առաջարկով, որ Ձեզ արեց՝ մաքրեք Ձեր շրթունքները»,- ասել էր նա՝ վկայակոչելով Բագրատ սրբազանին, որն ավելի վաղ և բոլորովին այլ կոնտեքստում էր նման արտահայտություն արել լրագրողի մասին։
Հետո, երբ աղմուկ էր բարձրացել, Անդրանիկ Քոչարյանը հայտարարել էր, որ չի պատրաստվում ներողություն խնդրել։ «Ընդամենը ես արձանագրել եմ, որ պետք է խոսքը օգտագործելուց լինի մաքուր»,- ասել էր իշխանական պատգամավորը:
Այս միջադեպից հետո լրագրողական համայնքը ստորագրահավաք նախաձեռնեց, ակցիաներ արեց, 160 լրագրողի ստորագրությամբ նամակ փոխանցվեց Փաշինյանին, իսկ երեկ, ինչպես հայտնեցինք, ԱԺ աշխատակազմը դրական եզրակացություն է տվել ընդդիմադիրների առաջարկին։
ԱԺ կանոնակարգ օրենքը սահմանում է՝ նախ աշխատակազմը պետք է եզրակացություն տա, որպեսզի երեքշաբաթյա ժամկետում դիմումատուներն օրենսդրական նախաձեռնությամբ հանդես գան։ Արծվիկ Մինասյանը երեկ մեզ հայտնեց, որ աշխատակազմը դրական եզրակացություն է տվել՝ հետեւյալ ձևակերպմամբ․ օբյեկտիվ քննություն անցկացնելու նպատակով պետք է ձևավորվի հանձնաժողով։ Ընդդիմադիրները մտադիր են նախագիծը հապշտապ ներկայացնել, որպեսզի այն մտնի եկող շաբաթ մեկնարկող հերթական նիստերի օրակարգ։ ՔՊ-ում դեռևս չեն քննարկել՝ կո՞ղմ են քվեարկելու էթիկայի հանձնաժողով ստեղծելու առաջարկին, թե՞ չեն պատրաստվում դատապարտել իրենց թիմակցին և դեմ կլինեն դրան։ Բանն այն է, որ, ի տարբերություն քննիչ հանձնաժողովի, որը նախաձեռնության դեպքում ձևավորվում է իրավունքի ուժով, էթիկայի հանձնաժողովի ձեւավորման համար Կանոնակարգ օրենքն այլ ընթացակարգ է սահմանում, այն կարող է ձևավորվել ԱԺ որոշմամբ, այսինքն՝ ՔՊ-ական մեծամասնությունը պարտադիր պետք է կողմ քվեարկի: Ավելին, եթե անգամ հանձնաժողովը ստեղծվի, այն կգործի միայն այն դեպքում, եթե ՔՊ-ից հանձնաժողովի անդամներ ներկայացնեն, տեսականորեն կարող են հանձնաժողովը ստեղծել, բայց չհամալրել կազմը՝ այդպիսով կանխելով դրա գործունեությունը: Կարճ ասած՝ եթե ՔՊ-ն դեմ լինի, այս հանձնաժողովի ձևավորումը հենց օրորոցում կխեղդի։
Մենք գրել էինք, որ Անդրանիկ Քոչարյանի հարցում ՔՊ-ում չկա միանշանակ մոտեցում, հատկապես կանանց գունդը, որը խնդիրներ է ունեցել նրա հետ, փորձում է միջադեպից օգտվել՝ թիմի ներսում առաջ տանելով նրան անարգանքի սյունին գամելու հարցը: Իսկ շարժառիթները տարբեր են․ մեկին Քոչարյանը դիտողություն է արել խորհրդարանին ոչ համապատասխան դրեսկոդի համար, մյուսին հեգնել է, թե շաբաթը ութ օր բյուջեի հաշվին շրջագայում է, երրորդին մի այլ պատճառով է խայթել։ Եվ արդեն շաբաթներ է՝ կանանց գունդը ներկուսակցական չաթերում պարբերաբար բարձրաձայնում է հարցը, որ Քոչարյանի վարքը քննության առարկա պիտի դառնա։
Հակառակ թիմից, սակայն, մեզ ասացին, որ Քոչարյանն էլ չի պատրաստվում ձեռքերը ծալած նստել․ երբ իր հարցը դրվի քննարկման, ինքը հատ-հատ կանդրադառնա մյուսների վարքին, կպահանջի, որ բոլորի վարքը քննության առարկա դառնա։ Իսկ Նիկոլ Փաշինյանը կթողնի, որ ՔՊ-ում իրար փոր թափեն, իրար միս ուտեն՝ առաջորդվելով «բաժանիր, որ տիրես» կարգախոսով, և միայն վերջում կա՛մ իր խոսքը կասի, կա՛մ իր կամակատարների միջոցով կուղղորդի գործընթացը: Իսկ մինչ այդ, իշխող թիմում ոչ մեկը չի կարող ասել, թե ինչ է սպասվում Անդրանիկ Քոչարյանին։ Եթե, այդուհանդերձ, որոշեն հանձնել նրան, Քոչարյանի վարքը քննելու հարցի հիմնական զեկուցող կնշանակվի ԱԺ պատգամավոր Թագուհի Թովմասյանը, որին հենց Քոչարյանի լոբբինգով է ՔՊ-ն զրկել Մարդու իրավունքների հանձնաժողովի նախագահի պաշտոնից, և որն առիթ է փնտրում՝ նրան պատժելու։
Առավել մանրամասն` թերթի այսօրվա համարում
