Փաշինյանի կառավարությունն արցախցիների հետ «բազարի» մեջ է մտել. «Հրապարակ»
«Հրապարակ» թերթը գրում է.
«Կառավարությունը թեեւ երեկվա նիստում ընդունեց Լեռնային Ղարաբաղից բռնի տեղահանված կարիքավոր ընտանիքներին լրացուցիչ սոցիալական աջակցություն տրամադրելու մասին որոշում, սակայն մարտի 28-ից պայքարի դուրս եկած արցախցիները դա հարցի լուծում չեն համարում եւ պատրաստ են շարունակել պայքարը։ Այդ ծրագրով սոցիալական աջակցություն կտրամադրվի արցախցի կարիքավոր ընտանիքներին՝ ամենամսյա դրամական աջակցության ձեւով՝ 2025 թ. ապրիլից մինչեւ դեկտեմբերը ներառյալ։ Ըստ կառավարության՝ կարիքավոր է համարվում այն ընտանիքը, որի մեկ անդամի հաշվարկով, ամսական եկամուտը ցածր է 55 հազար դրամից:
Նման ընտանիքի առաջին բռնի տեղահանված անդամին կտրամադրվի 40 հազար դրամ, մյուս անդամներին՝ 10 հազարական։ Այս տարվա ապրիլից կառավարությունը, հիշեցնենք, կրճատել է 40+10 հազար դրամ աջակցության ծրագիրը, աջակցություն տրվում է միայն երեխաներին, ծերերին եւ հաշմանդամներին։ Հիմա ընդլայնեցին շրջանակը, սակայն արցախցիները պահանջում են, որ 40+10 հազարի ծրագիրը շարունակվի այնքան ժամանակ, քանի դեռ իրենց բնակարանային հարցերը չեն լուծվել։
Բացի դա` նաեւ Արցախ վերադարձի ու գերիների ազատ արձակման պահանջներ են ներկայացրել ՀՀ կառավարությանը, որոնք Փաշինյանն ու իր կաբինետը մերժում են։ Արցախցիների իրավունքների պաշտպանության խորհրդի անդամներն օրերս փոխվարչապետ Տիգրան Խաչատրյանի հետ են հանդիպել:
Խաչատրյանը փոխանցել է, որ միայն սոցիալական խնդիրներն են քննարկելու։ Կառավարությունը պատրաստակամություն է հայտնել՝ եւս մեկ ամիս երկարաձգել 50 հազարի աջակցությունը, պայմանով, որ Ազատության հրապարակում տեղադրված վրանը հանեն։ Առաջարկել են մշակութային, սոցիալական, բնակարանների ապահովման հարցերով զբաղվող խմբեր ձեւավորել իրենց միջից, որ ՀՀ կառավարության հետ քննարկեն հարցերը, սակայն արցախցիները մերժել են այդ առաջարկները եւ հայտարարել, որ շարունակելու են պայքարը։ Մինչեւ ապրիլի 15-ը արցախցիները որոշել են կոնսուլտացիաներ անել հայաստանյան եւ արցախյան քաղաքական ուժերի, հասարակական կազմակերպությունների հետ, որից հետո կորոշեն իրենց անելիքները։ Մեզ ասացին, որ ապրիլի 15-ից հետո երկրորդ մեծ հանրահավաքն են նախապատրաստում։
Ի դեպ, մի կողմից կառավարությունը նահանջում է` լրացուցիչ ծրագիր ընդունելով, մյուս կողմից` արցախցիների դեմ արշավ են իրականացնում, նրանց մեղադրելով իբրեւ թե Հայաստանն Արցախի ճակատագրին արժանացնելու նկրտումների մեջ: Իրականում իշխանությունները վախենում են Արցախից Հայաստան տեղափոխված ժողովրդի շուրջ համախմբումից եւ զբաղված են խառնակչությամբ, որ նրանց շարքերը պառակտեն եւ պայքարը թուլացնեն։ Ի դեպ, նաեւ հասկանում են, որ սոցիալական պահանջներով սկիզբ առած պայքարը վաղ թե ուշ վերածվելու է քաղաքական պայքարի»:
Առավել մանրամասն թերթի այսօրվա համարում
