«Տոկի շիտն ու գազի հաշվիչն իրարից մի մետր էլ չեն հեռու». Վանաձորի Բազում թաղամասի շենքերից մեկում ամբողջությամբ այրվել է հոսանքի հաշվիչների արկղը. ՀԷՑ-ից ձայն-ձուն չկա (լուսանկար)

Վանաձորի Բազում թաղամասի շենքերից մեկում հրդեհ է բռնկվել: Բազմաբնակարաններից մեկի մեջտեղի շքամուտքում այրվել է հոսանքի հաշվիչների արկղը:

Այս մասին NEWSPRESS.am-ը տեղեկացել է շենքի բնակիչներից:

Նրանց փոխանցմամբ` դեպքը տեղի է ունեցել ապրիլի 11-ի երեկոյան:

«Մի կերպ էլեկտրիկին գտանք, եկավ հոսանքն անջատեց, ու հանգցրինք կրակը, մինչ հրշեջները կհասնեին»,- մեզ տեղեկացրեց բնակիչներից մեկը:

Նա նշում է նաև, որ շենքի հոսանքի ընդհանուր անջատիչն ապահովիչների արկղի մեջ է, որը փակ է եղել, և բնակիչներն իրենց ուժերով չեն կարողացել բացել՝ հոսանքն անջատելու համար:

«Եթե դրսում լիներ, շուտ անջատեինք՝ վնասը մինիմալ կլիներ, ուղիղ 20 րոպե չենք կարողացել հանգցնենք, քանի որ տոկը չէինք կարում անջատենք»,- նշում է բնակիչը:

Վերջիններս հույս են ունեցել, որ արդեն այսօր՝ ապրիլի 12-ին, ՀԷՑ-ն արագ կարձագանքի ու հարցը կլուծվի՝ կգան ու կփոխեն այրված արկղը:

«Դե մտածում էինք՝ հո մարդկանց առանց հոսանք չեն թողի։ Բայց դա նորմալ երկրներում, իսկ մեզ մոտ երևի օրեր կքաշի, որ ՀԷՑ-ը մի 10 հատ հաշվիչ, մի նոր արկղ ու լարեր բերի, որ մարդկանց հոսանքը վերականգնի»,- նշում է նա:

Այժմ հոսանքազրկված բնակիչները կասկածներ ունեն, որ խնդիրն արագ կարող է լուծում ստանալ:

«Մարդիկ տանը մի չնչին բացթողում անեն՝ տուգանում են, բա էլցանցին ու «Գազպրոմ»-ին տուգանող չկա՞. տոկի շիտն ու գազի հաշվիչն իրարից մի մետր էլ չեն հեռու»,- նշում է շենքի բնակիչը: